خار کې د بېکارۍ زیاتوالی؛ خلک له اسلامي امارته د پاملرنې غوښتنه کوي
تخار کې د کاري زمینو نشتوالي خلک اندېښمن کړي او وایي، له جدي اقتصادي ستونزو سره مخ دي.
د دغه ولایت اوسېدونکي د سرپرست حکومت له مسوولینو غواړي چې کاري زمینې ورته برابرې کړي.
د تخار اوسېدونکی حسیب الله چې هر سهار وختي د کار موندلو په موخه تالقان ښار ته راځي د کار له نشتوالي شکایت کوي او په خبره یې، د مرستندویه بنسټونو له مرستو هم بې برخې پاتې شوی دی.
حسیب الله طلوعنیوز ته وایي: «د حکومت مرستې موږ ته نه را رسیږي. کار او مزدوري نه پیدا کیږي. مقصد ژوند تېرېږي.»
تخار کې ځینې نور کارګر هم وايي، د هرې ورځې په تېرېدو سره یې اقتصادي ستونزې زیاتیږي او د دغه وضعیت دوام دوی اندېښمن کړي دي.
تخار کې کارګر، عبدالله و ویل: «دلته د کار او مزدورۍ لپاره راغلي یو. د سهار له شپږ بجو راهیسې تر اوسه چې د غرمې یوولس بجې دي، کار مو پیدا نشو کړای، په تمه یو خو کار نشته.»
بل کارګر، سمیع الله و ویل: «هر څلور یا پنځه ورځې وروسته که یو ځل کار پیدا کړو، که پیدا هم شي ما د ډېر عمر له امله نه بیایي. ژوند سخت دی، اولادونه ډوډۍ غواړي. کرنیزه ځمکه نه لرو، یوازې د ورځني کار له لارې د ژوند اړتیاوې پوره کوو.»
خو د تخار د کار او ټولنیزو چارو ریاست وايي، هڅه کوي چې دغه ولایت کې خلکو ته کاري زمینې برابرې کړي.
د تخار د کار او ټولنیزو چارو ریاست د ټولنیزو چارو امر، محمد اصف رحیمي و و یل: «د تخار د کار او ټولنیزو چارو ریاست د کار او ټولنیزو چارو وزارت په همکارۍ، د حرفوي زدهکړو پروګرامونه په پام کې نیولي، چې ژر به پیل شي. موږ به د نلدوانۍ، فلزکارۍ، خیاطۍ او موبایل جوړولو په برخو کې زده کوونکي جذب کړو، چې دا فعالیتونه کولای شي د بېکارۍ په کمولو کې مرسته وکړي.»
خو د اقتصادي چارو ځینې کارپوهان په دې باور دي چې یوازې د کسب زده کړې پروګرامونه نشې کولای د بېکارۍ ستونزه حل کړي بلکې، اړتیا ده چې سرپرست حکومت په کور دننه سترې بېخ بنايي پروژې پیل کړي څو هېواد کې د بېکارۍ کچه را ټیټه شي.
لومړی نظر وکړئ on "خار کې د بېکارۍ زیاتوالی؛ خلک له اسلامي امارته د پاملرنې غوښتنه کوي"