د غزني ولایت د ګیرو ولسوالۍ اوسیدونکي د مجهز روغتون د جوړولو غوښتنه کوي
د غزني ولایت د ګیرو ولسوالي، چې د ولایت یو له لرې پرتو او محرومو ولسوالیو څخه ګڼل کیږي، د روغتیایی اسانتیاوو له سخت کمښت سره مخ ده.
ځایي اوسیدونکي وايي چې په ولسوالۍ کې یوازې یو جامع روغتیایی مرکز (CHC) او څلور کوچني کلینیکونه شتون لري، چې د ناروغانو د روغتون کولو لپاره هیڅ زیربنا نلري.
د ګیرو ولسوال محمد ایوب جبیر وویل: “په ټوله ولسوالۍ کې، چې له 85,000 څخه ډیر نفوس لري، یوازې یو CHC کلینیک شتون لري، چې نه بستر لري او نه هم جراح. روغتیایی ستونزې ډیرې جدي دي او د دې خلکو لپاره د ولسوالۍ په کچه یو ښه مجهز روغتون جوړولو ته اړتیا ده.”
د ولسوالۍ یو اوسیدونکی ګل محمد هم وویل: “موږ په خپله ولسوالۍ کې لوی روغتون نلرو؛ موږ خپل ناروغان د غزني مرکز، قره باغ ولسوالۍ او ځینې وختونه شلګر ته لیږدوو.”
د سیمې قومي مشران وايي چې د ښه مجهز روغتون نشتوالي سربیره، د سړکونو خراب حالت هم د ناروغانو ستونزې څو چنده کړې دي.
د دوی په وینا، ځینې وختونه دا ننګونې میندو او ماشومانو ته په ګرانه بیه تمامې شوې دي.
د ګیرو ولسوالۍ یو قومي مشر اسدالله وویل: “زموږ ستونزې ډیرې شوې دي. موږ له حکومت څخه غوښتنه کوو چې د ګیرو ولسوالۍ ته ځانګړې پاملرنه وکړي. زموږ سړکونه په خراب حالت کې دي، زموږ ولسوالۍ شاوخوا ۱۰۰،۰۰۰ نفوس لري، خو موږ نه جراح لرو او نه هم معیاري روغتون.”
د قومي مشر جمعه ګل هم وویل: “زموږ د نسایي ولادي ناروغانو څخه یوې په لاره کې زیږون وکړ او مور او ماشوم دواړو خپل ژوند له لاسه ورکړ ځکه چې موږ جراح نه درلود او زموږ سړکونه په خراب حالت کې وو.”
د قومي مشر محمد زاهد هم زیاته کړه: “موږ د روغتون د جوړولو لپاره لس نیم جریبه ځمکه ځانګړې کړې او موږ سره ژمنه شوې وه چې زموږ لپاره به روغتون جوړ شي، خو تر اوسه پورې هیڅ عملي ګام نه دی پورته شوی.”
په ورته وخت کې، د غزني د عامې روغتیا ریاست چارواکي وايي چې په راتلونکي لمریز کال کې به د روغتیایی زیربناوو د برابرولو لپاره، د ګیرو ولسوالۍ او د ولایت په یو شمیر نورو لرې پرتو ولسوالیو کې د مجهزو کلینیکونو د جوړولو عملي کار پیل شي.
د غزني د عامې روغتیا رییس رسول خان نظري وویل: “د ګیرو ولسوالۍ لپاره د عمومي روغتون د جوړولو لپاره د تدارکاتو پروسه د روغتیا وزارت لخوا پیل شوې او موږ هیله لرو چې عملي کار به راتلونکی کال پیل شي. د دې روغتون په جوړولو سره به موجوده ستونزې تر ډیره حده حل شي.”
د یادونې وړ ده چې ګیرو ولسوالي د تیرو دوو لسیزو راهیسې د غزني ولایت یوه له جنګ ځپلو ولسوالیو څخه ده، او د ډاکټرانو او روغتیایی زیربناوو نشتوالی د دې سیمې د اوسیدونکو د اوږدمهاله ستونزو څخه ده.
لومړی نظر وکړئ on "د غزني ولایت د ګیرو ولسوالۍ اوسیدونکي د مجهز روغتون د جوړولو غوښتنه کوي"