د هرات-خواف وسپنې پټلۍ د وروستۍ برخې چارې په چټکۍ روانې دي
هرات کې مسوولین وايي چې د هرات–خواف وسپنې پټلۍ د وروستۍ برخې جوړولو کار په چټکۍ روان دی.
د دوی په خبره، د دغې وسپنې پټلۍ وروستۍ برخه د هرات ښار سویل کې تر صنعتي ښارګوټي او هوايي ډګر پورې رسیږي، چې ۴۷ کیلومتره اوږدوالی لري او څه باندې ۵۴ میلیون ډالره لګښت پرې راځي.
د پروژې مسوول، تمیم رحیمي و ویل: «موږ په دې پړاو کې ۴۷.۳ کیلومتره لار لرو چې د دې پروژې د عملي کولو لپاره مو ۲۰ کیلومتره هدف ټاکلی او د کېندنې او ډکولو کارونه له پلان سره سم روان دي. دلته د ټولګټو وزارت څلور څارونکي هم شته، چې هره ورځ د کار کیفیت څاري.»
د هرات د والي ویاند، محمد یوسف سعیدی و ویل: «د هرات-خواف ریل پټلۍ یوه ملي او سیمهییزه پروژه ده چې د هرات د سیمهییزې ادارې په هڅو او د اسلامي امارت د مرکزي ادارو په همکارۍ پکې کارونه په چټکۍ روان دي. موږ باور لرو چې د وسپنې پټلۍ پراختیا سره به د صادراتو او وارداتو د لیږد کچه زیاته شي.»
د ځايي مسوولینو په خبره، د دې پروژې د بنسټیزو کارونو په پرمختګ سره به د وسپنې پټلۍ د اېښودلو چارې هم پیل شي.
د ټولګټو وزارت اړوند انجینر، علي باقري په دې اړه وایي: «موږ هره ورځ د دې پروژې پر کیفیت څارنه کوو؛ هغه توکي هم ارزو، چې سیمې ته ځي او په سیمه کې بیا د شوي کار ارزونه هم کوو.»
دغه پروژه کې په کار بوخت کسان هم خوښ دي او وایي، د کاري زمینې له برابرېدو سره بهر ته له کډوالۍ خلاص شوي دي.
په دې پروژه کې بیا سلګونه هغه کسان هم په کار بوخت او وايي، چې دلته د کار تر پیدا کېدو وروسته؛ نورو هېوادونو ته له تللو خلاص شوي دي.
کارګر، عجب ګل و ویل: «زه ډېر خوشحاله یم چې دلته کار کوم، ځکه دلته زما لپاره د کار فرصت برابر شوی او زه اړ نه یم چې د کار لپاره ایران ته ولاړ شم.»
بل کارګر، محمد خان و ویل: «زه خوشاله یم چې په خپل هېواد کې زما لپاره د کار فرصت برابر شوی دی. که په هر ولایت کې داسې دندې برابرې شي، بیا اړ نه یو چې د کار لپاره نورو هېوادونو ته لاړ شو.»
د یادونې ده، چې د هرات-خواف وسپنې پټلۍ درې فازه تر دې وړاندې جوړ شوي دي.
لومړی نظر وکړئ on "د هرات-خواف وسپنې پټلۍ د وروستۍ برخې چارې په چټکۍ روانې دي"