ه ایرانه د ایستل شویو لپاره د مرستې په موخه د هرات مېشتو ولسي خوځښت
له ایرانه د افغان کډوالو د ایستلو بهیر له بېساري چټکتیا سره هممهاله، د هرات ولایت اوسېدونکي او ځينې خیریه بنسټونه د حکومت او نړۍوالو ادارو ترڅنګ، له کډوالو سره د مرستې په برخه کې مهم رول ادا کوي.
د کډوالو د ایستلو له زور اخیستو وروسته، د اسلامکلا په پوله کې د مرستې رسونې لپاره د ولسي خوځښت کچه څو برابره زیاته شوې ده. ډېر راستانه شوي افغانان وايي چې د ایران پولیسو یې ټوله شتمني نیولې او هغوی بېوسې، بېپیسو، او د خوړو او ټرانسپورټ له امکاناتو پرته هېواد ته راستانه شوي دي.
دغه وضعیت ته د رسېدنې په پار، یو خیریه بنسټ د اسلامکلا په سرحد کې یو پخلنځی فعال کړی چې هره ورځ نږدې ۵ زره ایستل شویو افغانانو ته د خوړو بستې چمتو کوي.
همداراز، خیریه افراد او نور بنسټونه هره ورځ زرګونه د خوړو او څښاک د اوبو بستې په وړیا توګه د تازه راستانه شویو افغانانو ترمنځ وېشي، څو د دوی ستونزې یو څه راکمې شي.
د یوه خیریه بنسټ استازی عبدالهادي بیدار په دې هکله طلوعنیوز ته وايي:«موږ هره ورځ پنځه زره کسانو ته خوراکي توکو ورکوو او د شپې هغوی ته کیک، د مېوو جوس او اوبه وېشو.»
د یوه بل خیریه بنسټ استازي غلام دستګیر شهید زاده هم وویل:«موږ دلته هره ورځ ښه، باکیفیته او ګرم خواړه چمتو کوو او له ایرانه پر راستانه شویو یې وېشو.»
همدارنګه د کډوالو د لېږد لپاره موټر د خلکو او خیریه بنسټونو له لوري په کرایه نیول کېږي
د هرات اوسېدونکی بصیر احمد احمدي په دې هکله وايي:«موږ دلته راغلي یو، له خپلو هېوادوالو سره چې له ایرانه راځي مرسته وکړو او هغوی تر هرات ښاره ولېږدوو.»
ډېری کډوال له ایرانه په تش جیب راستنول کېږي او د لارې کرایه نلري.
ځینې دغه کډوال ولسي مرستې اغېزناکې ګڼي.
له ایرانه را ایستل شوی صفيالله وايي:«له شلو کلونو غربت وروسته خپل هېواد ته راغلم او ډېر خوشحال یم. یوازې دا پاتې ده چې د خپل هېواد خاوره خپلو سترګو ته ووهو. په غربت کې موږ او زموږ هېوادوالو ډېر کړاوونه ګاللي دي.»
له ایرانه را ایستل شوي اختر محمد هم وویل:«موږ یوازې دومره توان درلود چې ځان تر پولې راورسوو، او ووینو چې زموږ وروڼه څه کوي او څنګه له موږ سره مرسته کوي.»
د هرات سیمهییز مسوولان هم تازه را ایستل شویو کډوالو ته ولسي مرستې مهمې یادوي.
د هرات د اسلام کلا بندر کمیسار حضرت اغا زعیم وویل:«د اسلامي امارت ترڅنګ، خلک او خیریه بنسټونه په ګډه له کډوالو سره مرسته کوي. د صفري کرښې په هره برخه کې کډوالو ته خدمتونه وړاندې کېږي؛ که دا د خوراکي توکو په برخه کې وي، نغدي مرستې وي، روغتیایي خدمتونه وي او که د هغوی اړوندو ولایتونو ته د لېږد په برخه کې وي.»
د هرات عالي دارالعلوم مسوول صبغت الله مولويزاده هم وايي:«له دغو اقداماتو سره موږ کولای شو بهرنیانو ته وښیو که څه هم د افغانستان ملت څه ډېر امکانات نهلري، خو لوړ همت لري. هغه خواړه چې په خپلو کورونو کې یې خوري، نیمایي کوي او خپلو کډوالو وروڼو او خویندو ته یې راوړي.»
د هرات د سیمهییزو مسوولانو د شمېرو پربنسټ په نږدې تېرو دوو اوونیو کې نږدې ۴۰۰ زره افغان کډوال د هرات د اسلام کلا بندر له لارې له ایرانه هېواد ته راستانه کړای شوي دي. ډېری دغه کډوال چې په تش لاس د ایران حکومت له لوري را ایستل کېږي، په جدي ډول مرستو ته اړتیا لري.
لومړی نظر وکړئ on "ه ایرانه د ایستل شویو لپاره د مرستې په موخه د هرات مېشتو ولسي خوځښت"