د افغانستان او جنوبي افریقا ترمنځ د درې یو ورځنیو لوبو د لړۍ لومړنۍ لوبه چهارشنبې سپتمبر ۱۸ (وږي ۲۸) د شپږ ویکټو په توپیر افغانستان وګټله.

دا لومړی ځل دی چې په نړیوال کرکټ کې د افغانستان ملي ټیم جنوبي افریقا ته ماتې ورکوي.

د افغانستان او جنوبي افریقا ترمنځ له دې
وړاندې دوه یو ورځنۍ او درې ۲۰ اوریزې لوبې شوې وې او ټولې د جنوبي افریـقا
په ګټه پای ته رسېدلې وې.

جنوبي افریقا نن د لوبې د پچې له ګټلو وروسته د
لومړي توپ وهلو پرېکړه وکړه او په ۳۳ اورونو کې د ۱۰۶ منډو کولو وروسته یې
ټول لوبغاړي وسوځېدل.

افغانستان وکولای شول چې دغه هدف د څلورو لوبغاړو په سوځېدو په ۲۶ اورونو کې پوره کړي او لوبه وګټي.

د افغانستان لپاره ترټولو زیاتې منډې ګلبدین نایب وکړې. هغه په ۲۷ توپونو ۳۴ منډې وکړې او ترپایه ونه سوځېد.

جنوبي افریقا د لوبې په لومړنیو ۱۰ اورونو کې د اوو لوبغاړو په سوځېدو یوازې ۳۶ منډې کړي وې.

دا د یو ورځینو نړیوالو لوبو په تاریخ کې د
جنوبي افریقا ترټولو کمې منډې دي او لومړنی ځل دی چې جنوبي افریـقا د یو
ورځني کرکټ په لومړنیو ۱۰ اورونو کې اووه لوبغاړي له لاسه ورکوي.

د افغانستان تیز توپ اچوونکي فضل الحق فاروقي
وکولای شول په خپلو لومړنیو څلورو اورونو کې د جنوبي افریقا درې لوبغاړي
وسوځوي. فاروقي څلور لوبغاړي وسوځول.

څلورمه، پنځمه او شپږمه ویکټ د افغانستان توپ اچوونکي الله محمد غضنفر واخیسته. راشد خان دوه لوبغاړي وسوځول.

دا لوبې د افغانستان په کوربه توب د متحده
عربي اماراتو په شارجه کې کیږي. دوهمه لوبه د جمعې په ورځ ده او ددې لړۍ
وروستۍ لوبه د سپتمبر په ۲۲مه کیږي.