د اتحاد هوايي شرکت کابل ته الوتنې زیاتوي
د اتحاد هوايي شرکت اعلان کړی چې د ۲۰۲۶ کال د می له لومړۍ نیټې څخه به د ابوظبي او کابل ترمنځ خپلې الوتنې ورځنیو الوتنو ته لوړې کړي.
په یوه مطبوعاتي اعلامیه کې، هوايي شرکت وویل چې دا اقدام د روان کال په پیل کې د مسافرینو د لوړې غوښتنې په ځواب کې شوی دی.
د اتحاد هوايي شرکت د عوایدو او سوداګریزو چارو مشر ایریک ډی وویل: “د مارچ په میاشت کې د کابل د الوتنو له پیل راهیسې، موږ د افغانستان، متحده عربي اماراتو او نورو ځایونو ترمنځ د مسافرینو قوي او دوامداره غوښتنه لیدلې ده.”
هوايي شرکت زیاته کړه چې د ورځني الوتنو زیاتوالی به د سفر انعطاف زیات کړي او د کابل، ابوظبي او د اتحاد د نړیوالې شبکې په اوږدو کې د نورو ځایونو ترمنځ اسانه اړیکه به زیاته کړي.
اتحاد هوايي شرکت د ۲۰۲۶ کال د مارچ په ۲۰مه نیټه افغانستان ته الوتنې پیل کړې، چې په اونۍ کې یې څلور الوتنې د کابل او ابوظبي ترمنځ وې.
د اتحاد هوايي شرکت په ګډون، ۱۰ نړیوال هوايي شرکتونه په افغانستان کې د مسافرینو او کارګو خدمات ترسره کوي.
لومړی نظر وکړئ on "د اتحاد هوايي شرکت کابل ته الوتنې زیاتوي"