د جرمني په بن ښار کې د افغان کونسلګرۍ په ودانۍ او پارکینګ کې نوې ودانیزې چارې او تغییرات د سیمه ییزو خلکو له نیوکو سره مخ شوي دي. کونسلګرۍ په خپل باغ کې انتظارخونه جوړه کړې او په وروستیو اونیو کې یې د کوڅې په اوږدو کې نوی ځنځیر اچولی.
د جرمني ډبلیو ډي ار ټلویزیون وايي، چې افغان کونسلګري د استوګنې په سیمه کې واقع ده او ځايي اوسیدونکي د کونسلګرۍ د فعالیتونو، شور او ځوږ او د پارکینګ ځایونو د بندېدو له امله اندېښمن دي.
د نورو ستونزو ترڅنګ رپوټونه وايي، چې کونسلګرۍ په خپله ودانۍ کې د ودانیزو چارو له جواز پرته کارونه ترسره کړي دي. کونسلګري په خپل باغ کې انتظارخونه جوړه کړې او په وروستیو اونیو کې یې د کوڅې په اوږدو کې نوی ځنځیر اچولی، چې لا زیاتې نیوکې یې راپارولې دي.
د مسیحي ډیموکراټ ګوند د ځايي شورا غړي ډیوید لوتز یاد تلویزیون ته ویلي، چې له دې سیمې نه د کونسلګرۍ د انتقال په تړاو خبرې اترې په افغانستان کې د ا.ا. له واکمنۍ وروسته ځنډول شوې دي.
د جرمني د بهرنیو چارو وزارت د افغانستان په کونسلګریو کې د مداخلې اړتیا نه ویني.
د یاد وزارت چارواکو ډبلیو ډي ار ته ویلي چې « فدرال حکومت په جرمني کې د افغانستان د استازځایونو په حالت کې هیڅ ډول تغییر نه دی راوستی».
سره له دې چې د ا.ا. د بهرنیو چارو وزارت اعلان کړی چې د بن کونسلګري نه مني، په کونسلګرۍ کې چارې لاهم روانې دي او پاسپورټونه تمدید کیږي، خو نوي پاسپورټونه نه ورکول کېږي او دا د کونسلګرۍ مشروعیت تر پوښتنې لاندې راولي.
د بن جنرال کونسل او په برلین کې افغان سفیر په دې وروستیو کې استعفاوې وکړې او ویې ویل چې د کوربه هېواد تر فشار لاندې دي.
په جرمني کې د افغانستان سفیر یما یاري د لړم پر ۲۸مه اعلان وکړ، چې د کوربه هېواد په غوښتنه یې له خپلې دندې استعفا کړې ده. یاري وویل چې د افغان وګړو او کډوالو د ستونزو د زیاتیدو مخنیوي په خاطر چې کېدای شي په جرمني کې د افغانستان د سفارت د تړل کیدو لامل شي، خپله دنده پای ته رسوي.
دیپلوماتیکو سرچینو افغانستان انټرنشنل ته وویل، چې عبدالباقي پوپل د یاري پر ځای په جرمني کې د افغانستان د سفارت مسوولیت پر غاړه اخستی دی.عبدالباقي پوپل مخکې په برلین کې د افغانستان د سفارت شارژدافیر و.
په بن کې د افغانستان کونسل لطف الله سادات هم اعلان کړی و، چې د کوربه هېواد د محدودیتونو او غوښتنو له امله خپله دنده پای ته ورسوي.
خو له دغو استعفاوو وروسته ا.ا. تراوسه د بن کونسلګرۍ او د برلین سفارت په اړه خپل دریځ نه دی په ډاګه کړی.
دغه دوه استازځایونه د مونشن کونسلګرۍ برعکس، یوازې پاسپورټونه تمدیدوي، خو نوي پاسپورټونه نه ور کوي، چې ښيي ا.ا. تر اوسه تعامل نه دی ورسره پیل کړی.
لومړی نظر وکړئ on "د جرمني په بن ښار کې په افغان کونسلګرۍ کې نویو ودانیزو چارو سیمه ییز خلک را پارولي"