د معلولانو نړۍوال ورځ؛ یو شمېر معلول کسان وايي اوسنۍ مرستې ورته بسنه نهکوي
د ډسمبر درېیمه د معلولینو له نړۍوالې ورځې سره برابره ده.
دا ورځ په داسې حال کې رارسېږي چې په کابل کې یو شمېر معلولان او د شهیدانو کورنۍ له خپل خراب اقتصادي وضعیت شکایت کوي.
د دوی له ډلې یو هم غلامحضرت دی چې د ژوند ستونزو او د معلولیت کړاو یې د ده او د کورنۍ ژوند سخت کړی دی.
هغه له اوښکو په ډکو سترګو او له درده په ډک زړه د مرستې د ترلاسه کولو لپاره د کابل د شهیدانو او معلولانو ریاست ته راغلی دی.
هغه وویل: «ناامیده شوې یم، درې ماشومان لرم؛ نه کار شته، نه عاید، له مجبوریته دلته راغلې یم چې کېدی شي دا خلک مرسته راسره وکړي.»
د هغه میرمن رویا هم چې له خپل خاوند سره یو ځای دغه ریاست ته راغلې وايي: «موږ نفقه راوړونکی نه لرو، له خپلو هېوادوالو غوښتنه کوو چې موږ سره مرسته وکړي.»
د هغه ترڅنګ، ۲۷ کلن محمد ناصر، له ماشومتوب راهیسې له معلولیت سره ژوند کوي، وايي د ژمي په رارسېدو سره یې تر اوسه سون توکي نه دي اخیستي او د ژمي د سړې هوا د تېرولو لپاره شوې مرستې هم ورته کافي نه دي.
هغه وویل: «زموږ لپاره هېڅ نه دي پاتې، هېڅ نه لرو، د سړک پر غاړه ماسکونه پلورم؛ کله کار وي، کله نه.»
د افغانستان د اسلامي امارت د شهیدانو او معلولانو وزارت د شمېرو له مخې، تر اوسه د ټول هېواد په کچه په دغه وزارت کې ۱۸۳ زره معلولان ثبت شوي دي.
ورته مهال د شهیدانو او معلولانو وزارت ویاند فیصل خاموش، معلولانو او د شهیدانو کورنیو ته د هغوی د حقوقو د ورکړې په اړه طلوع نیوز ته وویل: «د ټولو معلولینو لپاره مرستې پر وخت ترسره کېږي او د بانکي سیستم له لارې ورته په شفاف ډول ور رسیږي.»
همدارنګه د کابل د شهیدانو او معلولانو چارو ریاست مالي مدیر، فیضلله ذکي وویل: «د خوراکي توکو او نورو موادو وېش روان دی، موږ هڅه کوو نورې مرستې هم له موسسو ترلاسه کړو، په ځانګړي ډول د مسلکي مهارتونو لکه کسبهکارۍ برخه کې.»
په همدې حال کې په افغانسان کې د ملګرو ملتونو مرستندویه دفتر یا یوناما د معلولانو نړۍوالې ورځې په مناسب خپاره کړي پیغام کې له معلولانو څخه په ملاتړ ټينګار کړی دی.
دغه سازمان لیکلي: «اټکل کېږي چې نږدې ۱.۵ میلیونه افغانان له جدي معلولیتونو سره ژوند کوي چې ډېری یې د څو لسیزو جګړو او نښتو له امله معلول شوي دي، ماشومان په دې برخه کې تر ټولو زیات زیانمن دي، د معلولیت په نړۍواله ورځ موږ هغوی ته درناوی کوو او د ټولو لپاره د یو ټولګډوني، عادلانه او پایدونکې افغانستان غوښتنه کوو.»
د ډسمبر درېیمه په ۱۹۹۲ کال کې د ملګرو ملتونو له خوا د معلولینو د حقونو په تړاو د پوهاوي لوړلو او په ټولنه کې د دغه قشر لپاره د وړ ځای د رامنځته کولو په موخه د معلولانو نړۍوالې ورځې په نوم ونومول شوه.
لومړی نظر وکړئ on "د معلولانو نړۍوال ورځ؛ یو شمېر معلول کسان وايي اوسنۍ مرستې ورته بسنه نهکوي"