روان لمریز کال کې د څه باندې ۹ میلیونه ډالرو په ارزښت جنغوزې صادرې شوي
د صنعت او سوداګرۍ وزارت وایي، د روان لمریز کال په لومړیو اتو میاشتو کې د ۹ میلیونه ډالرو په ارزښت ۶۴۵ ټنه جنغوزې له هېواده بهر صادر شوي دي.
د دغه وزارت د ویاند په خبره، دغه جنغوزې تر ډېره چین، هند، متحده عربي امارتو، ايټالیا، سعودي عربستان، امریکا، کويټ او ځینو نورو هېوادونو ته صادر شوې دي.
د صنعت او تجارت وزارت ویاند، خندزاده عبدالسلام جواد و ویل: «د ۱۴۰۴ کال په اتو مياشتو کې د افغانستان توره جنغوزه چين، هند، متحده عربي اماراتو، ایټاليا، سعودي عربستان، امريکا، کویټ او نورو هېوادونو ته صادره شوې ده.»
د افغانستان جنغوزي د ښه کیفیت له امله په نړۍ په ځانګړي ډول په چین کې زیات پېرېدونکي لري.
سوداګر وايي، که د هوايي دهلیزونو له لارې د جنغوزیو صادرات زیات شي؛ نو لګښتونه به یې هم راکم او ګټه به یې ډېره شي.
سوداګر، محبوبالله محمدي و ویل: «هغه ننګونې چې لا هم پر ځای دي، په ډېرو هېوادونو کې د نندارتونونو نشتوالی، په نړۍوالو ډيجیټلي بي توبي پروګرامونو کې د افغانستان د دغه محصول نه ثبت او همداراز ډېری هېوادونو ته د خپلو توکو خام صادرول، په ځانګړي ډول چين ته دي.»
د سوداګرۍ او پانګونې خونې پخوانی رییس، اذرخش حافظي په دې اړه و ویل: «جنغوزه د وچو مېوو له مهمو صادراتي توکو څخه ده او بيه يې په نړۍوالو بازارونو کې لوړه ده. سږ کال بيې ډېرې مناسبې نه وې خو د هوايي دهلیزونو له لارې د صادرېدو ارزښت لري.»
د یادونې ده، چې جنغوزې تر ډېره په پکتیکا، پکتیا، خوست، ننګرهار، نورستان، کندز او د افغانستان په شمال ختیځو ولایتونو کې کیږي.
لومړی نظر وکړئ on "روان لمریز کال کې د څه باندې ۹ میلیونه ډالرو په ارزښت جنغوزې صادرې شوي"