غزني ته په وروستیو کلونو کې د بهرنیو سیلانیانو ورتګ زیات شوی دی.
د مسوولینو په خبره په تېر یوه کال کې ۳۴۵ بهرنيو سیلانیانو د غزني له تاریخي سیمو لیدنه کړې ده.
د غزني د اطلاعاتو او کلتور ریاست د ګرځندوی مدیر محمد مزمل هوتک طلوع نیوز ته و ویل: « تېر کال ۳۵۰ بهرني سیلانیان راغلي وو، ارقام ښيي چې په را روانو وختونو کې به هم زیات شمېر بهرني سیلانیان هېواد ته سفر وکړي او له غزني ولایت څخه به هم لیدنه وکړي.»
له کابل، بامیان او هرات وروسته تازه د سیلانیانو یوه نهه کسیزه هندۍ ډله دغه ولایت ته ورغلې ترڅو د غزني له تاریخي سیمو لیدنه وکړي.
دوی چې ډېری یې د پاخه عمر لرونکي دي وایي، د افغانستان او غزني په اړه یې اوریدلي وو خو په خبره یې د تېرو درې لسیزو نامناسبو شرایطو له امله راتګ ستونزمن وو.
هندي سیلاني امېت چوهدري وویل: « د افغانستان په اړه مې ډېر څه اورېدلي وو، له زړه مې غوښتل دلته راشم خو په تېرو درېیو لسیزو کې حالات مناسب نه وو.»
بلې هندۍ سیلانۍ امیشا داسې وویل: «غزنوي امپراتوري زموږ پر تاریخ او کلتور زیات اغېز لري، زموږ د راتګ اصلي دلیل دا وو چې موږ راغلو دا منار او د محمود غزنوي مزار وګورو.»
دغه هندي سیلانیان وايي دلته اوسني شرایط له هغه څه سره ډېر توپیر لري چې دوی یې په اړه اورېدلي وو.
هندۍ سیلانۍ ريټي پارنا سرکار و ویل: «وګوره هغه څه چې موږ پخپل هېواد کې په تلویزیونونو کې لیدل د باور وړ نه وو، زه ځکه راغلم هغه څه وګورم چې اورېدلي مې وو.»
هندي سیلانۍ مونشیسري داسې وایي: «زه ځکه دلته راغلې یم چې د افغانستان پخوانی تاریخ وګورم، زما لپاره زړه راښکوونکې وه، ستاسو میلمه پالنه ډېره عالي وه.»
د غزني د اطلاعاتو او کلتور ریاست مسوولین ډاډمن امنیت او د سیلانیانو لپاره اړینې اسانتیاوې دغه ولایت ته د بهرنیو سیلانیانو د شمېر زیاتېدو لاملونه ګڼي.
لومړی نظر وکړئ on "غزني ته د سیلانیانو ورتګ زیات شوی دی"