د پاکستان د پخواني لومړي وزیر او د تحریک انصاف ګوند د مشر عمران خان له نیول کېدو یوه ورځ وروسته، سرچینو ویلي چې عمران خان به لږ تر لږه د څلورو یا پنځو ورځو لپاره په توقیف کې تېرې کړي.

ډان ورځپاڼې نن چهارشنبه (د مې په ۱۰مه) د پاکستان د حساب ورکولو ملي ادارې (ان‌ای‌بي) د سرچینو په حواله راپور ورکړ چې دا اداره به نن محکمې ته د خان په توقیف کې د ساتلو غوښتنه واستوي.

د دې ادارې ځینې سرچینو ویلي چې تمه کېږي د پاکستان د حساب ورکونی ملي اداره، د پاکستان د تحریک انصاف مشر لپاره د ۱۴ ورځو د توقیف غوښتنه وکړي.

دغو سرچینو ټینګار کړی، چې ښايي محکمه له یادې مودې څخه د څلورو تر پنځو ورځو پورې د خان د توقیف په اړه موافقه وکړي.

ویل کیږي چې د پاکستان له پخواني لومړي وزیر څخه به د اداري فساد، د ځمکې د غیر قانوني استملاک، د القادر ټرسټ پوهنتون د جوړولو او له هغه څخه د ۱۹۰ میلیونه پونډه غیر قانوني ګټې اخیستنې په قضیه کې، پوښتنې وشي.

په پاکستان کې د عمران خان نیول کېدل، د تحریک انصاف د پلویانو له پراخو اعتراضونو سره مخ شوی دی.

د اسلام اباد پولیسو نن چهارشنبه د دغه ښار مهم سړکونه، د لاریونوالو د کنټرول لپاره تړلي دي.

ویل شوي، چې لږ تر لږه د نن لپاره د پاکستان د پنجاب په ایالت کې د عمران خان د ټاکنیزې حوزې ښوونځي هم تړل شوي دي.

د خان د پلویانو د لاریونونو په خپرو شویو ویډیوګانو کې لیدل کېږي چې قهرجنو لاریونوالو، د اسلام اباد پر سړکونو موټرونو ته اور اچولی او له پولیسو سره یې نښتې کړې دي.

منبع