ترهګرې ډلې له اوږدې مودې راهیسې د خپلو کړنو د توجیه کولو او د پلویانو د راجلبولو لپاره له مذهبي تبلیغاتو څخه کار اخلي، خو لږ شمېر یې د خراسان ډله په څیر د دوکې سره دا کار کوي. د دوی د روژې میاشتي وروستی تبلیغاتي پوسټر – چې روژه نیول د ځان صفا کولو میاشت بولي – د دوی منافقت په څرګنده توګه ښکاره کوي. د خراسان ډله له مسلمانانو څخه غواړي چې تقوا، صبر، او رحم خپل کړي، خو په عمل کې هغوی ویره خپروي، عام وګړي په نښه کوي، او هغه اصول چې دوي یې دفاع کوي، هغه تر پښو لاندې کوي.
د خراسان ډله په تبلیغاتو کې یو مهم پیغام “عبادت کې اخلاص” ته بلنه او د “ریاکارۍ” پر ضد خبرداری ورکوي. خو دا ډله پخپله د مذهبي منافقت تر ټولو کرغیړن ډول ترسره کوي: د مثال په توګه، دوی د اسلام په نوم خپل وحشتناک جرمونه توجیه کوي. دا ډله، چې د جوماتونو او عامو خلکو په وژلو کې لاس لري، ځان د اسلام مدافع بولي، خو د اسلام اساسي اصول، لکه رحمت او عدالت، ښکاره تر پښو لاندې کوي.

مذهبي تبلیغاتو
بل متضاد ټکی د دوی په پیغامونو کې د روژې مبارکې میاشتې پر مهال د “رحمت او شفقت” ټینګار دی. دوی د اسلام هغه ښوونې یادوي چې مسکینانو ته د خواړو ورکولو او د زړسختۍ څخه د ډډه کولو سپارښتنه کوي. خو د خراسان څانګې ډله هرځل ثابته کړې چې د بیګناه ژوند هېڅ ارزښت نه لري، ځکه چې دوی د واک ترلاسه کولو لپاره بازارونه، ښوونځي او د عبادت ځایونه په نښه کوي. د دوی د رحم تعبیر د هغو بې ‌شمېره قربانیانو تر درد نه رسېږي، چې د دوی د بریدونو ښکار شوي دي. دا د روژې د میاشتې له حقیقي روحیې – چې د شفقت، زغم او ځان‌ ساتنې لپاره ځانګړې شوې – په څرګند ډول ټکر کې دي.
د خراسان ډله خپلو پلویانو ته ټینګار کوي چې “وخت باید بې‌ځایه ضایع نشي” او خلک باید له بې‌ ګټې بوختیاوو، لکه ټولنیزو رسنیو او تفریحي فعالیتونو څخه ډډه وکړي. خو له بلې خوا، همدا ډله خپلې پراخې سرچینې د انټرنیټي تبلیغاتو لپاره ځانګړې کړې، ترڅو افراطي مفکورې خپرې کړي او نوي پلویان جذب کړي. که دوی واقعاً د ګټورو فعالیتونو ملاتړ کولای، نو خلکو ته به یې د علم، ټولنیزې خدمتګزارۍ او اقتصادي پرمختګ لاره ښوولې، خو پر ځای یې دوی تاوتریخوالی، ویجاړتیا او د تشدد ترویج ته وده ورکوي، او د خپلو پلویانو ژوند او وخت تر ټولو زیانمنونکي ډول ضایع کوي.
له دې پیغامونو څخه لاندې پایلې ترلاسه کیدی شي: د خراسان ترهګرې ډلې د روژې میاشتې تبلیغات یوه دوکه ده، چې هڅه کوي ځان د اخلاق او مذهب واکمن په توګه وښيي، پداسې حال کې چې خپله تر ټولو ستر وحشیانه جنایتونه ترسره کوي. دوی د دیني اصولو تحریف ته لاس اچوي، ترڅو خپل پلویان وغولوي – پداسې حال کې چې نور غندي، خو پخپله له هر ډول ظلم او وحشت څخه کار اخلي. په راتلونکې برخه کې به موږ د دوی دا منافقت نور هم بربنډ کړو، او وبه ښیو چې دوی د خپلې اجنډا د پلي کولو لپاره د مصرف، اخلاقو او دعدالت اسلامي مفکورو څخه ناوړه ګټه پورته کوي.

مذهبي تبلیغاتو

امواج پرس افغانستان