د امریکا د متحده ایالاتو پوځ د چهارشنبې په ورځ د مرغومي ۱۲مه، په رسمي توګه وویل چې ۴۲ کلن شمس الدین جبار، د تګزاس اوسیدونکي د یو پیک اپ موټر د نیواورلینز ښار په زړه کې پر هغو خلکو وروخیژاوه، چې د نوي کال د جشن نمانځلو ته ورټول شوي وو.

نوموړي ۱۳ کاله د امریکا په پوځ کې خدمت کړی و او یو ځل افغانستان ته هم استول شوی و.
نوموړي له هغه وروسته چې پر جشن کونکو یې موټر وروخیژاوه پر پولیسو یې هم ډزې وکړې چې په پایله کې پخپله هم ووژل شو.

دغه برید د چهارشنبې په سهار د نوي کال په لومړۍ ورځ د نیواورلینز ښار په زړه کې چې ډیر سیلانیان هلته ورځي شوی دی چې له امله یې ۱۵ تنه وژل شوي او لسګونه نور ټپیان شوي دي.
د نیواورلینز فډرال پولیس وایي چې په دغه برید کې جبار یوازې نه و. هغوی دمګړۍ په پېښه کې د نورو ښکیلو کسانو په لټه کې هم دي.
ایف بي ای ویلي چې جبار پخپل موټر د داعش بیرغ لګولی و، دغه بنسټ دغه برید ته د ترهګریز برید په سترګه ګوري او له همدې اړخه یې پلټنه کوي.
په داسې حال کې چې پلټنې روانې دي، خو نر اوسه دا جزییات نه دي خپاره شوي چې ولې شمس الدین جبار چې په تګزاس کې زیږیدلی او لوی شوی و او بیا یې د امریکا د پوځ په لیکو کې دنده هم ترسره کړې وه، دغه برید وکړ.
د رویټرز د خبري اژانس د خبر له مخې، جبار له ۲۰۰۷ کال څخه تر ۲۰۱۵ کاله پورې د پوځ په لیکو کې د انساني سرچینو د کارپوه په توګه دنده لرله.
د پوځ یوې سرچینې منلې، چې شمس الدین جبار د ۲۰۰۹ کال له فبرورۍ څخه د ۲۰۱۰ کال تر جنورۍ پورې په افغانستان کې دنده ترسره کړې ده.
د امریکا د سمندري ځواکونو یو چارواکي هم رویټرز ته ویلي، چې جبار په پوځ کې تر دندې وړاندې د ۲۰۰۴ کال په اګسټ میاشت کې د سمندري ځواکونو په لیکو کې نوملیکنه کړې وه، خو یوه میاشت وروسته بیا له دندې لرې شوی و.
د شمس الدین جبار کاري مخینه ښيي چې نوموړی په وروستیو کلونو کې په بېلابېلو دندو بوخت و.
نوموړي د ځمکو په برخه کې د سلاکار په توګه هم دنده ترسره کړې وه، هغه ویلي و: «ما دغه مهارتونه زده کړي و د املاکو د سلاکار په توګه مې له یادو شویو مهارتونو کار اخیست او هغه څه چې ما د املاکو له نورو سلاکارانو څخه بیلوي هغه دا دي چې زه دغه ځواک په ځان کې وینم چې یو سرسخته مرکه کونکی یم.»
د شمس الدیت جبار د کاري سوابقو څخه مالومیږي چې د ۲۰۲۳ کال تر فبرورۍ پورې د څلورو کالو لپاره د املاکو سلاکار پاتې شوی و.
ایف بي ای په دې باور دی چې هغه پیک اپ فورډ موټر کرایه کړی و. هغه له هغې وروسته چې پر خلکو یې موټر وروست پر پولیسو یې هم ډزې وکړې.
د نوموړي پر موټر د داع-ش د بیرغ ځړیدل د دې لامل شول چې د نورو ترهګریزو ډلو سره د هغه د تړاو په اړه احتمالي پلټنې پیل شي. پولیسو هغه وسله او چاودیدونکي توکي په هغه ځای کې هم موندلي چې جبار پر خلکو برید کړی و.
د ایف بي ای ځانګړي سلاکار التیا دانکن، د چهارشنبې په ورځ وویل: «موږ باوري نه یو چې جبار دې په ځانته سر دغه برید تر سره کړی وي. موږ به د هرې ورکې مشوړې سر ولټوو.»
د محکمې اسناد ښیي چې جبار په ۲۰۲۲ کال له پنځو ګالو ګډ ژوند وروسته خپله میرمن طلاقه کړې وه. هغه یو زوی لري.
د رویټرز د راپور له مخې داسې نه ښکاري چې جبار دې تر دې وړاندې د تاوتریخوالي ډکه کارنامه ولري. د تګزاس د سوابقو له مخې جبار په ۲۰۰۲ کاا کې د غلا په تور محاکمه شوی و او په ۲۰۰۵ کال کې د موټر چلولو د لایسنس د نشتوالي له امله هم نیول شوی و.
نبویارک ټایمز د جبار د ورور له خولې لیکلي چې هغه په ځوانۍ کې مسلمان شوی و.

منبع