د کندهار په میروېس حوزوي روغتون کې د اکسیجن یو تولیدي پلانټ جوړولو چارو د پیل ترڅنګ دغه روغتون کې پنځه نوې څانګې پرانیستل شوې دي.
د مسوولینو په خبره، دغه روغتون کې تېره میاشت د یوولسو ولایتونو د ۴۱ زره ناروغانو درملنه شوې ده.
د کندهار میروېس حوزوي روغتون امر، منور احمد منور و ویل: «دا د زون په کچه روغتون دی، دلته د زون تر څنګ د نورو ولایتونو ناروغان هم د درملنې په موخه راځي. موږ په تېره یوه میاشت کې د ۴۱ زره ناروغانو درملنه کړې، چې په دې کې له دوه زره زیات کوچني او لوی جراحي عملیاتونه هم شامل دي. زموږ خدمتونه تر پخوا زیات شوي دي.»
د میروېس روغتون سرطبيب، عبدالقيوم ايوبي و ویل: «د لبروسکوپي، انډوسکوپي، الټراسونډ څانګې مو فعالې کړي، د درملو ستونزه مو حل کړې او د اکسجن پلانټ جوړولو کار روان دی.»
دا مهال د میروېس حوزوي روغتون په یوولس څانګو او ۳۴ برخو کې ناروغانو ته روغتیايي خدمتونه وړاندې کیږي.
په همدې حال ځینې ناروغان وايي، د پخوا پرتله دغه روغتون کې روغتیايي اسانتیاوې زیاتې شوې دي.
د کندهار اوسېدونکي، رحمت الله رحمتي و ویل: «دلته خدمتونه تر پخوا ښه شوي، زما دوه ماشومان ناروغ او بستر دي، دوی ته ښه رسېدنه کیږي، خوښ یم.»
د روزګان اوسېدونکي، عبدالقدير و ویل: «له روزګانه مې ناروغ پلار را وستلی، چې د زړه ناروغي لري. له درملنې یې خوښ یم او ټول روغنیاپالان ورسره ښه کوي. زه دلته وینم، چې ځينې روغتیايي څانګې هم زیاتې شوې دي.»
د کندهار د میروېس حوزوي روغتون مسوولین دغه راز زیاتوي چې د روغتیايي کارکوونکو د ظرفیت لوړونې هڅې یې چټکې کړې دي.
لومړی نظر وکړئ on "د کندهار په میروېس حوزوي روغتون کې پنځه نوې څانګې فعاله شوې دي"