مادی پرسته داعشیان د مادیاتو او پیسو څخه د جلب او جذب لپاره کار اخلي.

په تیرو وختونو کې مو په دې خبرې وکړې چې داعش څنګه د نړی په بیلابیلو سیمو کی له بیګناه او ملکی بزګرانو او سوداګرو څخه په زوره پیسی اخلي. نن به په دې اړه خبرې وکړو چې داعش څنګه د نړۍ له جنګ ځپلو سیمو څخه د بې روزګاره، بې وزله او نالوستو ځوانانو د جلب او جذب لپاره د مادیاتو او پیسو څخه کار اخلي.

د ډیرو نورو بیلابیلو میتودونو په مینځ کې، د داعش لخوا د زیان منونکو ځوانانو د استخدام لپاره یو له خورا بدنامه طریقو څخه د مادیاتو او پیسو په وسیله جلب او جذب دی. له فقر او بېکارۍ څخه ډکې سیمې کې د داعش مالي هڅونه د شریر مادی پرسته خوارج لخوا په خورا ناوړه توګه کار اخیستل کیږي. پداسې حال کې چې د داعش تبلیغات د مذهبي متن غلط تفسیر کوي او ادعا کوي چې مذهبي انګیزې د دې لامل کیږي چې خلک له داعش سره یوځای سي، خو حقیقت بیا بل څه ښیي. د مادی پرسته داعش اکثره نیول سوي جنایتکاران له داعش سره د یو ځای کیدو اصلي او ځینې وخت یوازینی لامل د پیسو انګیزه یادوي. دوی ادعا کوي چې دوی ګمراه سوي وه او داعش د دوی په سیمه کې له بې وزلۍ او بی روزګارۍ ګټه پورته کړې.

داعش د منځنۍ اسیا بې روزګاره، بې وزله او نالوستو ځوانانو ته د درواغوجنو هیلو د ورکولو لپاره د مذهب او پیسو څخه د یوی ترکیبی انګیزی کار اخلي.که چیری پام وکړو نو د شوروي اتحاد له ړنګېدو وروسته د منځنۍ اسيا ډېری هېوادونه د کمزوري اقتصاد او د ديني زده کړو له محدوديتونو سره په تيارو کې پاتې سول. د بېلګې په توګه، په افغانستان او نړۍ کې د داعش ډېری وروستي جنایتکاران چی نیول سوي یا وژل سوي دی نو اکثرا یی د تاجکستان اتباع دي.

تاجکستان چې له لسو میلیونو څخه کم نفوس لري په روسیه او د نړۍ په نورو هیوادونو کې تر دوه میلیونو ډیر مهاجر کارګران لري. دغه ځوانان چې زیاتره یې له غریبو کورنیو څخه دي، د مالي موخو لپاره مهاجرتونه کوي. داعش د دغو مهاجرینو له ناوړه مالي وضعیت څخه ګټه پورته کوي او دغو ځوانانو ته مالي وعدی او په درواغو د مذهبي نجات لپاره غلطی هیلی را پاروي.

هغه طریقه چې داعش د دغو مهاجرینو د استخدام لپاره کاروي په لومړی سر کی مادی وعدی وي او بیا وروسته دغه ځوانان تر دماغی مینځلو تیریږي چی د نظامی عملیاتو لپاره تیار سي. بیا وروسته له دوی څخه ځانمرګي او چریکیان جوړیږي. ډیری دا استخدام سوي، چې یوازې هدف یی د پیسو لاسته راوړنه ده داعش ته جذب سوي، وروسته بیا پښیمانه وی او تر پخوا ډیر د بد حالت سره مخ سي. ځکه چي د داعش ډلې مشران که چیری په دوی پوه سی چی ددوی فکر تغیر کړی او د داعش څخه تيښته کوی نو زندانی او شکنجه کوی يي.

د یادولو وړ ده چې د داعش دغه مالي انګیزی کله نا کله بعضی بډایه خو وږسترګی سرمایه داران هم د داعش لومي ته غورځوي. په هر صورت، د منځنۍ اسیا د هېوادونو بې وزله او نالوستي ځوانان د داعشی ځناورو د ښکار اسانه قربانیان دي. د داعش د نیول شویو ورستیو مجرمینو د خبرو پر اساس دوی یوازی د مادیاتو او پیسو لپاره د داعش سره یوځای کیږي. او دا خبره خپله ددی ثبوت دی چی داعش څنګه د منځنۍ اسیا او په ځانګړې توګه د تاجکستان له بې وزله ځوانانو څخه د پیسو او مادیاتو له طریقي د جلب او جذب لپاره کار اخلي.

په ټولیزه توګه داعش د خپل موجودیت د ساتلو لپاره د نړۍ په جګړه ځپلو سیمو کې له اقتصادي، سیاسي او ټولنیزو تشو څخه ګټه پورته کوي. د منځنۍ اسیا له هېوادونو بې وزله، ناپوه او نا امیده ځوانان د داعش طبیعي ښکار ګرځېدلي دي. پداسې حال کې چې د نړۍ په نورو برخو کې هم غربت سته ،خو د داعش لخوا د مذهبی او مالی ترکیبی انګیزه جوړونی څخه استفاده او د دیني متنونو ناسم تفسیر د بې وزلو او نالوستو تاجک ځوانانو د استخدام لپاره یوه اغیزمن لاره بلل سوی ده چی باید مخه یی ونیول سي.

شریک یي کړئ