د صنعت او سوداګرۍ وزارت وایي، په تېرو اتو میاشتو کې له روسیې سره د ۲۲۷ میلیونه ډالرو په ارزښت سوداګریزه راکړه ورکړه شوې ده.

د دغه وزارت د ویاند، اخندزاده عبدالسلام جواد
په وینا د دغې راکړې ورکړې له منځه درې میلیونه ډالره صادرات او ۲۲۴
میلیونه ډالره یې واردات دي.

ښاغلي جواد زیاته کړه: «له روسیې سره د
افغانستان د سوداګرۍ کچه د ۲۰۲۴ کال په لومړنیو اتوو میاشتو کې ۲۲۷ میلیون
ډالره وو چې درې میلیونه یې صادرات او پاتې ۲۲۴ میلیونه یې واردات دي. د
تېر کال پرتله دغه راکړه ورکړه ۱۸ سلنې زیاته شوې ده.»

بل پلو، د سوداګرۍ او پانګونې د خونې لومړي
مرستیال د روسیې ته د خپل سفر پر مهال د روسیې د سوداګرۍ د خونې له
مسوولانو سره د سوداګریزو اړیکو د پراختیا، اقتصادي پرمختګ، او د پانګونې د
جذب په تړاو خبرې کړې دي.

د سوداګرۍ او پانګونې خونې لومړي مرستیال،
محمد یونس مهمند و ویل: « موږ هڅه کوو چې روسیې ته د تازه مېوې او وچې مېوې
صادرات زیات کړو. روسیه د افغانستان د تازه مېوې لپاره ډېر ښه مارکیټ دی.»

د اقتصادي چارو ځينې شنونکي هم وایي، له روسیې سره د سوداګریزو اړیکو پراختیا د هېواد په اقتصادي پرمختګ کې اغېزناکه ده.

د اقتصادي چارو شنونکي، شاکر یعقوبي په دې اړه
و ویل: «په طبیعي سرچینو او برېښنا برخو کې پانګونه یوه جدي اړتیا ده. ددې
ترڅنګ چې نړۍوال بندیزونه هم دي، روسیه د یوه بدیل بازار په توګه کارېدای
شي. له بل لوري د افغانستان جغرافیوي موقعیت د دې لامل کیږي چې د سویلي
اسیا او منځنۍ اسیا ترمنځ ارتباطي پل شي.»

د صنعت او سوداګرۍ وزارت د معلوماتو له مخې،
په تېرو اتو میاشتو کې له روسیې سره د ۳۳۴ میلیونه ډالرو په ارزښت
سوداګریزه راکړه ورکړه شوې ده.