د خوراکي توکو لېږد کې ګډوډي؛ هېواد کې د خوړو د ناامنۍ زیاتېدو خبرداری

د خوړو نړۍوال پروګرام ویلي، په منځني ختیځ کې د پوځي کړکېچونو له امله د خوړو د لېږد بهیر کې رامنځته شوي خنډونه به په افغانستان کې د خوړو د ناامنۍ وضعیت لا پسې خراب کړي.

د فایننشل ټایمز د راپور له مخې، د خوړو نړۍوال پروګرام د اکمالاتي ځنځیر مشر ویلي چې نږدې ۷۰ زره ټنه خوراکي توکي د تدارکاتي ستونزو او په سمندر کې د کښتیو د مسیر د بدلون له امله بند پاتې دي.

دې چارواکي په ټینګار سره ویلي چې له دې وړاندې هم د افغانستان لویه برخه وګړي د خوړو له ناامنۍ سره مخ وو.

اقتصادي شنونکی، شاکر یعقوبي په دې اړه وايي: افغانستان د بل هر وخت په پرتله د لوړې بې‌وزلۍ او هېواد ته د کډوالو د بېرته ستنېدو له امله بشري مرستو ته ډېره اړتیا لري او د پاکستان د لارو تړل کېدل او همداراز په ایران کې د جګړې دوام د بشري مرستو رسونه او د هېواد اقتصادي وضعیت اغېزمن کړی دی.»

د خوړو نړۍوال پروګرام ویلي چې افغانستان ته د مرستو رسولو لپاره یې بدیلې ځمکنۍ لارې یې له متحده عربي اماراتو څخه د څو هېوادونو، لکه سعودي عربستان، اردن او ترکیې له لارې فعالې کړې دي.

خو د لېږد دې لارې او د سون‌توکو لګښتونه په څرګنده ډول زیات کړي دي.

اقتصادي شنونکي بشري مرستو ته د افغانستان اړتیا ته په اشارې ټینګار کوي چې د دې وضعیت دوام کولای شي خلک له لا ډېرو ستونزو سره مخ کړي.

د خوړو نړۍوال پروګرام د اکمالاتي ځنځیر مشر، کورین فلیشر ویلي: «د ملګرو ملتونو دغه اداره اړ شوې چې د مرستو یوه برخه له ځمکنيو لارو ولېږدوي.»

بل لور ته بیا اقتصاد وزارت وايي، روانو جګړو پر ټولې نړۍ تاثیر کړی او دوی هڅه کوي، چې د بېلابېلو پرواګرامونو له لارې د خلکو اقتصاد تامین کړي.

د اقتصاد وزارت مسلکي مرستیال، عبداللطیف نظري وايي: «زموږ غوښتنه له مرستندویو بنسټونو څخه دا ده چې د خپلو مرستو د رسولو لپاره له بدیلو لارو استفاده وکړي. د اسلامي امارت تګلاره پر کورنیو ظرفیتونو تکيه ده، او موږ غواړو چې د پراختیایي پروژو د وضعیت د ښه کولو له لارې د هېواد اقتصادي ودې کې مرسته وشي.»

دا اندېښنې په داسې حال کې مطرح کېږي چې د ملګرو ملتونو د راپور پر بنسټ، د افغانستان اقتصاد لا هم له جدي ستونزو سره مخ دی او د خلکو لویه برخه نړیوالو مرستو ته اړتیا لري.

همدارنګه په راپور کې ویل شوي چې که دا ګډوډۍ تر جون میاشتې پورې دوام وکړي، نو په نړۍ کې د هغو کسانو شمېر چې له شدید خوراکي کمښت سره مخ کېږي، ښایي تر ۴۵ میلیونو کسانو پورې زیات شي.

منبع