د لومړي ځل لپاره قطر ته ۷۰۰ افغان کارګران استول کیږي
هېواد کې د بېکارۍ کچې په لوړېدو سره سم، د کار او ټولنیزو چارو وزارت وایي، قطر ته یې د افغان کارګرانو د لېږد زمینه برابره کړې ده.
د دغه وزارت د ویاند په خبره، په لومړي ځل د قطر د یوه ګډ دولتي شرکت او د افغانستان د کارموندنې د خصوصي شرکتونو ترمنځ هوکړه شوې، چې لمخې به یې په لومړي پړاو کې د افغان کارګرانو لپاره ۷۰۰ کاري فرصتونه برابر کړي.
د کار او ټولنیزو چارو وزارت ویاند، سمیع الله ابراهیمي و ویل: «د کار او ټولنیزو چارو وزارت په هڅو په لومړي ځل د قطر شاهي هېواد د ګډ دولتي شرکت او افغان خصوصي شرکتونو ترمنځ د افغان کارګرانو لېږد هوکړه وشوه، چې لمخې یې د اوس لپاره افغان کارګرانو لپاره ۷۰۰ کاري فرصتونه برابر شوي دي.»
د اقتصادي چارو شنونکي، احمد فردوس بهگزین و ویل: «که موږ وکولای شو چې پر کارخونو، بنسټیزو پروژو، کانونو او نورو برخو تمرکز وکړو، نو د هېواد دننه به د کار زمینې برابرې شي، چې له لارې یې کولای شو خپلو ځوانانو ته د کار فرصتونه برابر کړو.»
اسدالله یو له دغه راز کارګرانو دی چې هره ورځ له سهاره تر ماښامه د کابل د یوه واټ پر غاړه د کار په تمه وي، د خپل ژوند له ستونزو شکایت او وايي، د کار نشتوالي ورته ژوند سخت کړی دی.
اسدالله طلوعنیوز ته وایي: «موږ د ژوند له ستونزو سره لاس و ګرېوان یو؛ کار نشته، بیکاري ډېره ده.»
دغه اقدام د سلګونه هغو افغانانو لپاره د یوې نوې هیلې بلل کیږي چې له سختو اقتصادي ستونزو سره مخ دي.
لومړی نظر وکړئ on "د لومړي ځل لپاره قطر ته ۷۰۰ افغان کارګران استول کیږي"