ملګري ملتونه وايي، چې د یوناما نوې سیاسي مرستیاله جورجیت کانیون د خپلې دندې د ترسره کولو لپاره کابل ته ورسېده.

دغه کاناډایي حقوق پوهه د روانې میاشتې په سر کې د م، م د سرمنشي انتونیو ګوټریش له‌خوا په افغانستان کې د ملګرو ملتونو د سیاسي استازولۍ مرستیاله وټاکل شوه.

ملګرو ملتونو د یکشنبې په ورځ په یوه خبرپاڼه کې لیکلي، چې مېرمن ګانیون د سولې په بهیر کې خپله ۲۸ کلنه تجربه، د بشري حقونو او له جګړې وروسته سیمو کې د پرمختګ په برخو کې د ستراټیژیکو نوښتونو تجربې افغانستان ته راوړي.

نوموړې د ۲۰۱۰ کال څخه تر ۲۰۱۵ م کاله په کابل کې د یوناما د بشري حقونو د مدیرې په توګه هم کار کړی.

مېرمن ګانیون له ۲۰۲۱ کال وروسته د لېبیا په چارو کې د ملګرو ملتونو د ملاتړ په ماموریت کې د ملګرو ملتونو د سرمنشي د ځانګړې استازې د مرستیالې او د بشري چارو د همغږي کوونکې په توګه دنده ترسره کړې ده.

نوموړې په افریقا، سوریه او بالکان کې د ملګرو ملتونو، ملي حکومتونو او نادولتي موسسو سره د ولسي وګړو د ساتنې، بشري حقونو او د قانون حاکمیت په برخه کې د مشرې او لوړپوړې مشاورې په توګه کار کړی دی.

اغلې ګانیون په کاناډا کې د یورک پوهنتون څخه په حقوقو کې لیسانس او د انګلستان د ایسکس پوهنتون څخه د نړۍوالو بشري حقونو په برخه کې ماسټري لري.

دا ښځینه کاناډایي حقوقپوهه په داسې حال کې په کابل کې د یوناما د سیاسي مرستیالې په توګه کار پیلوي، چې ا.ا. د امربالمعروف وزارت د نوي قانون په تصویب سره پر ښځو بندیزونه څو برابره زیات کړي دي.

د ا.ا. د بندیزونو او د بشري حقونو په ځانګړې توګه د ښځو له حقونو څخه د پراخو سرغړونو په غبرګون کې څلورو هېوادونو جرمني، کاناډا، اسټرالیا او هالنډ مخکې شوي، او غوښتنه یې کړې چې دغه ډله د عدالت نړۍوالې محکمې ته وړاندې کړي.

منبع