د صنعت او سوداګرۍ وزارت وايي، د روان هجري لمریز کال په لومړیو پنځو میاشتو کې د افغانستان او منځنۍ اسیا هېوادونو ترمنځ د نږدې ۷۰۰ میلیونه ډالرو په ارزښت راکړه ورکړه شوې ده.
د صنعت او سوداګرۍ وزارت ویاند وایي، دغه موده کې افغانستان د ۶۰ میلیونه ډالرو په ارزښت منځنۍ اسیا ته صادرات کړي دي.
اخندزاده عبدالسلام جواد وایي د صنعت او سوداګرۍ وزارت منځنۍ اسیا ته د صادراتو کچې د لوړولو هڅې کوي.
هغه و ویل: « د ۱۴۰۳ کال په لومړیو پنځو میاشتو کې له منځنۍ اسیا سره د افغانستان راکړه ورکړه په عادي ډول روانه وه، چې د ۶۰ میلیونه ډالرو په ارزښت صادراتو او ۶۲۴ میلیونه ډالرو په ارزښت وارداتو په ګډون د ۶۸۴ میلیونه ډالرو په ارزښت راکړه ورکړه شوې ده.»
په هېواد کې د اسلامي امارت تر بیا واکمنېدو وروسته د منځنۍ اسیا له هېوادونو سره د افغانستان سوداګریزې راکړې ورکړې ته ډیره پاملرنه شوې ده.
د منځنۍ اسیا هېوادونو له استازو سره د اسلامي امارت د استازو کتنې او د ګډو نندارتونونو جوړولو د دغو هېوادونو سره د افغانستان د سوداګرۍ پر پراختیا مثبت اغېز کړی دی.
د سوداګرۍ او پانګونې خونه هم وايي، منځني اسیا ته د صادراتو د ډېرېدو لپاره باید د سوداګرۍ او ټرانزیټ په برخو کې اسانتیاوې رامنځته شي.
د سوداګرۍ او پانګونې خونې ویاند، جان اقا نوید و ویل: « د سیمه ییزو هېوادونو په ګډون د نړۍ له بېلابېلو هېوادونو سره زموږ اړیکې د پراختیا په حال کې دي. صادرات مو په ډېرېدو دي او له بېلابېلو هېوادونو واردات دوام لري.»
د صنایعو او کانونو خونې لومړی مرستیال، سخی احمد پیمان وایي: « موږ ډېری توکي د منځنۍ اسیا له هېوادونو واردوو او صادرات مو صنعتي توکي دي. هیله من یم چې منځنۍ اسیا ته زموږ د صادراتو او وارداتو توازن هغې کچې ته ورسیږي چې دغه سیمه د افغانستان تولیدي توکو لپاره ښه بازار بدله شي.»
د صنعت او سوداګرۍ وزارت د شمېرو لمخې افغانستان په کال کې شاوخوا لس میلیارده ډالره سوداګریزه راکړه ورکړه لري چې له دې ډلې دوه میلیارده ډالر یې صادرات او اته میلیارده ډالر یې واردات دي.
لومړی نظر وکړئ on "روان کال کې منځنۍ اسیا سره د افغانستان د راکړې ورکړې کچه"