عبدالشکور په اسلام اباد کې له اتو کلونو ژوند کولو وروسته په چټکۍ سره خپل ټول هغه توکي بسته کړل چې کورنۍ یې له ځانه سره وړي.
نوموړی تېره اوونۍ په ټول پاکستان کې له اسنادو پرته د مېشتو بهرنیو اتباعو پرضد د روان کړکېچ له امله بېرته افغانستان ته ستون شو.
د شکور مور، مېرمن او څلور ماشومان د هغو میلیونونو افغانانو په ډله کې وو چې د روان کال له اکتوبر میاشتې راهیسې خپل پلرني ټاټوبي ته د تلو لپاره پولې ته رسېدلي دي.
پاکستاني چارواکو هغوی ته امر کړی چې په خپله خوښه افغانستان ته ولاړ شي او یا له اخراج سره مخامخ شي.
که څه هم دا پریکړه په ټول هیواد کې په ناقانونه توګه میشتو بهرنیانو باندې پلي کیږي، افغانان تر ټولو ډیر اغیزمن شوي دي ځکه چې په پاکستان کې د 4 میلیونو څخه 1.7 میلیونه غیر راجستر شوي افغانان اوسیږي.
په ۱۹۷۹ کال کې پر افغانستان د پخواني شوروي اتحاد د یرغل او د بېلابېلو جګړو له امله چې څو لسیزې یې دوام وکړ، په میلیونونو افغانان له هېواده ووتل او پاکستان ته ولاړل. د کلونو په اوږدو کې یو شمېر افغانان هېواد ته راستانه شول او نور له افغانستانه ووتل
په ۲۰۲۱ کال کې د امریکا په مشرۍ ایتلاف له وتلو او طالبانو دغه جګړه ځپلی هېواد تر خپل واک لاندې راوستو وروسته ډېری دغه افغانان بهر ته وتښتېدل.
خو د افغان چارواکو د اټکل له مخې له اکتوبر میاشتې راهیسې شاوخوا څلور لکه افغانان له پاکستانه خپل هېواد ته ستانه شوي دي.
عبدالشکور پرېکړه وکړه چې کابل ته ولاړ شي چېرته چې خور يې ژوند کوي او کورنۍ به يې هم ورسره په همدې کوټه کې پاتې کېږي.
موږ کابل ته رسیدلي یو او هیڅ نه لرو.
په دومره بیړه له پاکستانه وتل ډېر ګران کار وو. د پاکستان حکومت باید لږ تر لږه پنځه یا شپږ میاشتې وخت ورکړی وای چې له هیواده ووځو.
د هغه په ​​وينا، داسې نه دي شوي. موږ د افغانستان له اوسني حکومت څخه غواړو چې موږ ته کور او کار راکړي، نور څه نه.
افغان ادارې ژمنه کړې چې له راستنېدونکو سره به مرسته کوي، خو لا له وړاندې له کړکېچن اقتصاد سره مخ دی.
افغانستان د طالبانو له واکمنۍ راهیسې تر نړیوالو بندیزونو لاندې دی او په دغه هېواد کې د بېکارۍ کچه دوه برابره شوې ده.
که څه هم د افغانستان د کډوالو چارو وزارت راستنېدونکو کورنیو ته نغدي پیسې ورکوي، خو د هغوی د اړتیاوو د پوره کولو لپاره کافي نه دي.

داودجبارخیل