م.م؛ ۲۱ میلیون افغانانو سره مرستې لپاره ۱.۷ میلیارده ډالرو ته اړتیا ده
د ملګرو ملتونو سرمنشي، انتونیو ګوترش امنیت شورا ته د افغانستان د وضعیت او بشري اړتیاو اړوند راپور وړاندې کړی دی.
په دغه راپور کې د ۲۰۲۶ کال د بشري اړتیاو او غبرګون پلان کې د ۱.۷۱ میلیارد ډالرو غوښتنه شامله ده، څو له ۲۱.۹ میلیونه اړمنو کسانو ۱۷.۵ میلیونو ته لومړنۍ او ژوند ژغورونکې مرستې و رسول شي.
په دغه راپور کې پر افغانستان د پاکستاني رژیم د هوايي او توغندیزو بریدونو د زیاتېدو یادونه هم شوې ده.
راپور ویلي: « له پاکستان سره د فرضي کرښې دواړو غاړو کې د جګړو زیاتېدو، چې پکې د توپونو ډزې، هوايي بریدونه او د ډرون فعالیتونه شامل دي، د ملکي وګړو مرګژوبلې او د ملکیتونو د زیان سبب شوي دي.»
ګوترش زیاته کړې، د ملګرو ملتونو د نشهيي توکو او جرمونو دفتر (UNODC) د راپورونو له مخې، له ۲۰۲۳ کال کې د کوکنارو د کښت د بندیز له پلي کېدو وروسته که څه هم په ټول هېواد کې د کوکنارو کښت په پام وړ ډول کم شوی، خو تمرکز یې له سوېل لوېدیځ د هېواد شمال ختیځو سیمو ته لېږدول شوی دی.
د ملګرو ملتونو په نوي راپور کې ویل شوي چې که څه هم افغانستان کې نسبي ثبات لیدل کېږي، خو بشري، سیاسي او اقتصادي ستونزې مخ په زیاتېدو دي. د نړیوالو مرستو کمېدل، د کډوالو پراخې راستنېدنې، طبیعي پېښې او د سیمې سوداګریزو ستونزو د افغانانو ژوند لا سخت کړی دی.
راپور ټینګار کوي چې پر ښځو او نجونو محدودیتونه د بشري حقونو خلاف دي او له نړۍوال نظام سره د افغانستان بېرته یوځای کېدو مخه نیسي.
همداراز د نجونو د زدهکړو بندیز چې له شپږم ټولګي پورته دوام لري، باید ژر تر ژره پایته ورسېږي.
ملګرو ملتونو ویلي چې د افغان ښځو پر کار محدودیتونه د دې سازمان د فعالیتونو پر بهیر هم اغېز کوي او غوښتنه یې کړې چې ښځینه کارکوونکو ته د کار اجازه ورکړ شي.
همداراز راپور کې له ګاونډیو هېوادونو د افغان کډوالو پراخې راستنېدنه یوه لویه ننګونه بلل شوې ده، ځکه ډېری راستنېدونکي د استوګنې، کار او اسنادو له ستونزو سره مخ دي.
لومړی نظر وکړئ on "م.م؛ ۲۱ میلیون افغانانو سره مرستې لپاره ۱.۷ میلیارده ډالرو ته اړتیا ده"