د بدخشان په زیباک کې طبیعي ښکلاو د ګرځندویانو پام ور اړولی دی
د بدخشان د اطلاعاتو او کلتور ریاست وایي، د دغه ولایت د زیباک ولسوالۍ د توپ خانې جهیلونه هر کال د سلګونه کورنیو او بهرنیو سېلانیانو کوربه وي.
شنه طبیعت، مناسبې اب و هوا او د خال لرونکو کبانو شتون دغې سیمې ته د سېلانیانو پام ور اړولی دی.
ځینې سېلانیان چې د تفریح په موخه دغه جهیل ته راغلي، دا سیمه د هېواد له کمسارو طبیعي ښکلاو بولي او له هېوادوالو غواړي چې له دې ځایونو لیدنه وکړي.
سېلاني، فاروق احمد طلوعنیوز ته و ویل: «زیات شمېر سېلانیان دې سیمې ته راځي او له جهیلونو لیدنې کوي. دا سیمه ارامه او ښه فضا لري.»
بل سېلاني، احسان الله و ویل: «زما له نورو سېلانیانو غوښتنه دا ده چې دې سیمې ته لاړ شي، څو د ګرځندوی صنعت وده ومومي او د بدخشان ښکلي ځایونه هم و ویني او ښې خاطرې له ځان سره یوسي.»
د بدخشان د اطلاعاتو او فرهنګ ریاست د ګرځندوی امر، صدیقي لعلزاد دغې سیمې ته د سېلانیانو د ورتګ په تړاو و ویل: «د اطلاعاتو او کلتور ریاست هڅه کوي چې د کورنیو او بهرنیو سېلانیانو د جلبولو په موخه ډېر ژر د دې تفریحي سیمې د پرمختګ لپاره هڅې وکړي.»
د بدخشان د اطلاعاتو او فرهنګ ریاست دغه راز وايي، په وروستیو کلونو کې د دې ولایت بېلابېلو سیمو ته د کورنیو او بهرنیو سېلانیانو ور تګ زیات شوی او دوی هڅه کوي، چې لا ډېرې اسانتیاوې ورته برابرې کړي.
لومړی نظر وکړئ on "د بدخشان په زیباک کې طبیعي ښکلاو د ګرځندویانو پام ور اړولی دی"