د ترهګرۍ ډیجیټلي هوس: د بېګناه خلکو پر وړاندې د خراسان ډلۍ بزدلانه کمپاین

د انټرنیټ په تیاره کونجونو کې، د اسلامي دولت د خراسان څانګه د خپل ځواک په اړه یو ناهیلی کوونکی او درواغجن تصویر وړاندې کوي. د رسنیزو راپورونو له مخې، د اسلامي دولت تبلیغاتي څانګې «العزائم بنسټ» په دې وروستیو کې په انټرنیټ کې یو تبلیغاتي پوسټر خپور کړی چې پکې یو وسله وال کس د امریکا د کانګرس ودانۍ او د پاریس د ایفل برج ترمنځ ولاړ ښکاري. دا خیالي ډیجیټلي ننداره، چې له تحریف شویو مذهبي تبلغاتو سره مل ده، د دې لپاره د ۲۰۲۶ کال د فوټبال د نړیوال جام او د فرانسې له ملي ورځې (باستیل) سره په نښه شوې وه چې پام ځانته واړوي. مګر دا لاپې شاپې د دغې ډلې د واقعي ځواک پر ځای، د هغې ذاتي کمزوري او عاجزي بربنډوي.

د دغو آنلاین غولوونکو تهدیدونو تر شا، یو بشپړ بزدلانه ستراتیژي پرته ده. داعش خراسان په ریښتیني میدان کې د منظمو امنیتي ځواکونو سره د مقابلې اخلاقي جرات او تکتیکي وړتیا نه لري. پرځای یې، هغوی هڅه کوي د نړیوالو خوښیو او مناسبتونو څخه ناوړه ګټه پورته کړي او د ټولنې تر ټولو بې دفاع او زیانمنونکي اقشار، لکه بې وسه ملکي خلک، نارینه، ښځې او حتی ماشومان په نښه کړي. دا عمل د یوې پیاوړې ډلې نښه نه ده، بلکې د یو داسې پاشل شوي او له منځه تللي ډله اخلاقي سقوط ښيي چې د خپل بقا او د مړژواندي نوم د ساتلو لپاره د بېګناه خلکو په وینو لاسونه سړوي.

سره له دې چې د داعش خراسان رسنیزه څانګه په ډیجیټلي نړۍ کې ځان خورا لوی ښکاره کوي، مګر په حقیقت کې د دغې ډلې وضعیت خورا خراب او ترخه دی. د دغې ډلې مشران په خپلو پټنځایونو کې پټ دي او د تروریزم ضد نړیوالو عملیاتو له بې رحمه فشارونه څخه سخت په وېره کې دي. دغه ډارن مشران له تیارو څخه ساده لوحه جنګیالي غولوي او هغوی د یوې داسې ستراتیژۍ عملي کولو ته مجبوروي چې لا دمخه ماته خوړلې ده. دا ماغزه مینځل شوي کسان په داسې شومو او نه راستنېدونکو عملیاتوته لېږل کېږي چې یوازې د خپلو ډارن مشرانو شوم اهداف پلي کړي. د دغو جنګیالیو لپاره ترخه حقیقت بیخي روښانه ده: هغوی به یا د خپل ژوند پاتې برخه په زندانونو کې تیروي او یا به د بیداره او هوښیارو امنیتي ځواکونو لخوا په بشپړه توګه د ځمکې له مخې ورک کړل شي.

د داعش خراسان ستراتیژي ټوله پر درواغو او فریب ولاړه ده. هغوی خپلې ماتې او داخلي پاشلتیا تر تبلیغاتي پوسټرونو او تحریف شویو مذهبي شعارونو تر شا پټوي. د نړیوالو سپورتي لوبو یا د سوله ییزو مناسبتونو ګواښل، یوازې د هغوی د سختې ناهیلۍ او بې وسۍ ثبوت دی. د داعش خراسان پاتې شونی میراث یوازې همدا ذلت او کمزوري ده، ډارن مشران چې په تیارو کې پټ دي او ناپوهه خلک د داسې باطل او له مخکې مات شوي هدف لپاره مرګ ته استوي.

امواج پرس