د تاجېکستان او قرغېزستان ولسمشرانو د کاسا زر پروژې یوه برخه پرانیسته.
د تاجېکستان ولسمشر امام علي رحمان او د قرغېزستان ولسمشر صادق جباروف د ډاټکا -سګد ۵۰۰ کیلو ولټه بریښنا مزي چارې چې د کاسا ۱۰۰۰ پروژې یوه له بنسټیزو برخو څخه ده، پیل کړې.
د انټرفاکس د راپور لمخې، د کاسا زر پروژې د رغاونې چارې په تاجکستان او قرغزستان کې بشپړ شوي او تمه ده تر ۲۰۲۷ زیږدیز کال پورې په افغانستان او پاکستان کې هم بشپړې شی.
د اقتصادي چارو شنونکي، عبدالنصیر رښتیا و ویل:«افغانستان کولی شي له دې پروژې ۳۰۰ میګاواټه برېښنا ترلاسه کړي؛ دا به د نورو پانګونو جذبولو او د هېواد د جیوپولیټیکي موقف پیاوړتیا لامل شي. د دې پروژې د تطبیق سره، د افغانستان اعتبار د راتلونکو پانګونو لپاره هم زیاتېږي.»
تر دې وړاندې د اوبو او انرژۍ وزارت ویلي وو، چې په افغانستان کې د کاسا زر پروژې کار ۷۰ سلنه پرمختګ کړی دی.
اقتصاد وزارت هم وايي، چې اسلامي امارت په سیمه کې د کاسا زر پروژې د اهمیت په پام کې نیولو سره د دغې سترې پروژې ملاتړ کوي.
د اقتصاد وزارت مسلکي مرستیال، عبداللطیف نظري هم بیا وايي: «اسلامي امارت په افغانستان کې د کاسا-۱۰۰۰ پروژې ملاتړ کوي. ټول هېواد کې امنیت ټینګ دی او دا پروژه هېواد ته ډیری ګټې لري.»
یو شمېر کارپوهان هم برېښنا د افغانستان د اقتصاد او صنعت د ودې لپاره یوه له بنسټیزو اړتیاوو څخه ګڼي او په افغانستان کې دننه د کاسا زر پروژې د بشپړېدو لپاره د نړیوال بانک پر ملاتړ ټینګار کوي.
د اقتصادي چارو یو بل شنونکی، نجیب الله صدیقي بیا په دې اړه وايي: «اوس موږ هیله لرو چې نړۍوال بانک د دغې پروژې پاتې د ۳۰٪ تمویل هم وکړي څو کار یې بشپړ شي.»
د یادولو وړ ده چې د کاسا زر پروژه د منځنۍ اسیا له هیوادونو څخه د افغانستان له لارې د سویلي اسیا د برېښنا بازارونو ته د ۱۳۰۰ میګاواټه بریښنا د لیږد طرحه ده چې په پلي کیدو سره به یې افغانستان ۳۰۰ میګاواټه بریښنا او په کال کې شاوخوا ۵۰ میلیونه ډالره ټرانزیټ ترلاسه کړي.
لومړی نظر وکړئ on "د کاسا ۱۰۰۰ پروژې د یوې برخې د کار پیل"