هېواد کې د اوبو ۲۴ لوي او منځني بندونه فعال دي
د اوبو او انرژۍ وزارت وایي، دا مهال په ټول هېواد کې ۲۴ واړه او لوی د اوبو بندونه یا فعال دي او یا هم د ګټې اخیستنې پړاو ته نږدې شوي دي.
د دې وزارت د مسوولانو په وینا، له دغو بندونو څخه د برېښنا د تولید، د کرنیزو ځمکو د خړوبولو او د اوبو د سرچینو د غوره مدیریت لپاره ګټه اخیستل کېږي.
مسوولان زیاتوي، دا مهال د یو شمېر مهمو پروژو، لکه د بخشآباد بند، پلتوني بند، شفلوغ بند، په شمال کې د قوشتیپې کانال، په ختیځ کې د شاهي کانال او په جنوب کې د نهرالسراج پروژو چارې هم روانې دي.
د اوبو او انرژۍ وزارت ویاند، مطیعالله عابد، وویل: «په هېواد کې نږدې ۲۴ منځني او لوی بندونه شته چې ډېری یې فعال دي. دغه بندونه د سلګونو مېګاواټه برېښنا د تولید ترڅنګ زرګونه هکټاره کرنیزه ځمکه هم خړوبوي.»
اقتصادي شنونکي وایي، افغانستان د اوبو له پراخو سرچینو سره سره، لا هم د اوبو د اغېزناک مدیریت او د برېښنا د کم تولید له ستونزې سره مخ دی.
د دوی په باور، د لویو بندونو جوړول کولی شي د کورنۍ برېښنا تولید زیات، کرنه پیاوړې، د اوبو د ضایع کېدو مخه ونیسي او پر وارداتي برېښنا د هېواد تکیه کمه کړي.
اقتصادي شنونکي، عبدالله پوهان، وویل: «د بندونو د جوړولو لپاره اړینه ده چې حکومت نړیوال معیارونه په پام کې ونیسي او بندونه په لوړ کیفیت جوړ کړي، څو د اوږدې مودې لپاره ترې ګټه واخیستل شي. همدارنګه، د پروژو د قراردادونو په ورکړه کې باید شفافیت په پام کې ونیول شي.»
یو بل اقتصادي شنونکي، سید مسعود، وویل: «که موږ خپلې اوبه او ځمکې په سمه توګه مدیریت کړو، د ۱۷۶ میلیونه خلکو د خوړو اړتیا پوره کولی شو، همدې شمېر خلکو ته برېښنا او انرژي برابرولی شو او آن برېښنا صادرولای شو. اوس شاوخوا ۱۴.۵ میلیارد متر مکعب اوبه پاکستان ته بهېږي، چې له همدې اوبو څخه د برېښنا د تولید ظرفیت شته.»
د یادونې وړ ده چې افغانستان د اوبو له پلوه لوړ ظرفیت لري، خو د بندونو او اړینو زېربناوو د نشتوالي له امله، هر کال د هېواد د اوبو لویه برخه ګاونډیو هېوادونو ته بهېږي.
لومړی نظر وکړئ on "هېواد کې د اوبو ۲۴ لوي او منځني بندونه فعال دي"