د کرکټ د ۲۰۲۳ کال په نړیوال جام کې د دوشنبې په ورځ اکتوبر نهمه (تلې ۱۷) نیوزلنډ هالنډ ته په ۹۹ منډو ماتې ورکړه.
لوبه د هند په حیدراباد کې وشوه. دا په روان نړیوال جام کې د نیوزلنډ دویم بری او د هالنډ دویمه ماتې وه.
نیوزلنډ په ۵۰ اورونو کې د ویل یانګ د ۷۰ منډو او د راچین روېندرا او ټام لیتام د پنځوسیزو په مټ هالنډ ته د ۳۲۲ منډو هدف وټاکه.
د هالنډ ټوله لوبډبه په ۴۷ اورونو کې وسوځېدله او یوازې یې ۲۲۳ منډې وکړې. د هالنډ کولن اکرمن ۶۹ منډې وکړې او نورو لوبغاړو یې کومه خاصه کارنامه ونکړه.
د لوبې غوره لوبغاړی د نیوزلنډ چپ لاسی ورو توپ اچوونکی مېچل سنټنر شو چې د هالنډ پنځه لوبغاړي یې وسوځول او په توپ وهنې کې یې هم ۳۶ منډې وکړې.
سبا سه شنبه د کرکټ په نړیوال جام کې دوې لوبې دي، چې بنګله دېش به له انګلنډ سره او پاکستان به له سري لانکا سره مخامخېږي.
د افغانستان د کرکټ د ملي لوبډلې مشهور لوبغاړي راشد خان په افغانستان کې د وروستۍ زلزلې د قربانیانو له کورنیو سره د مرستې اعلان کړی او افغان کرکټ بورډ هم ویلي دي چې دوه میلیون افغانۍ به له زلزلې ځپلو سره مرسته کوي.
لومړی نظر وکړئ on "هالنډ د کرکټ د ۲۰۲۳ په نړیوال جام کې خپله دویمه لوبه هم وبایلله"