د چنې وهلو جهاد
د خراسان څانګه د خلافت ژمنه کوي، خو په دې وروستیو کې داسې ښکاري چې په ارزانه بازارموندنه قانع شوې ده.
دې ډلې په دې وروستیو کې په پاکستان کې د دوو هدفي وژنو پړه پر غاړه اخیستې ده: په باړه کې د طالبانو د پخواني غړي حمزه چې په «خلیفه» مشهور و، او په واڼه کې د مولوي نذیر ډلې پورې تړلي پخواني قومندان محمد خالد زلي‌خېل وزیر وژنه. دا د هغو بریدونو بېلګې دي چې د داعش خراسان څانګه یې اوس د خپل دوامداره ځواک د ثبوت په توګه کاروي: یو بې‌دفاع او یوازې کس پیدا کول، ورباندې ډزې کول او بیا د «اسلامي دولت» لپاره د بلې لویې بریا اعلانول.

او بیا په کابل…
د کابل په هزاره مېشته سیمه «دشت برچي» کې یوه ښوونځي ته نږدې د لاسي بم چاودنې، د ۹ او ۱۴ کلونو ترمنځ لږ تر لږه ۴۲ ماشومان ټپیان کړل. د دې پېښې د مسؤلیت په اړه لا هم څېړنې روانې دي، که څه هم د طالبانو چارواکو په ښکاره داسې انګیرلې چې د دې برید تر شا د داعش یا د هغوی د کومې تړلې ډلې لاس درلودلی شي.
که داسې وي، نو دا پېښه له یوې جدي او وېروونکې تګلارې سره پوره سمون خوري:
یو لاسي بم. یوه تومانچه. یو بې‌دفاع یا ځانګړی هدف. او بیا تبلیغات چې هڅه کوي دا ډول عمل د یوې پوځي بریا په توګه وښیي.
دې ته د «د چنې وهل جهاد» ویلی شو.

تبلیغات او حقیقت
تاوتریخوالی یو تریخ حقیقت دی او قربانیان یې د دې مستحق نه دي چې د هغوی درد او کړاو په تبلیغاتي ابزارو بدل شي. مګر تاوتریخوالی د ځواکمنتیا په مانا نه دی. د داعش خراسان څانګه ادعا کوي چې د یو داسې انقلابي خوځښت استازیتوب کوي چې حکومتونه به نسکوروي او خلافت به رامنځته کوي. د دې معیار له مخې، د پخوانیو چارواکو ترور کول او د ماشومانو په منځ کې د لاسي بمونو غورځول د پرمختګ نښه نه ده؛ بلکې د دې ښکاره ثبوت دی چې دا ډله له خپلو هیلو څخه څومره لرې پاتې ده.
د دوی تر کنټرول لاندې قلمرو مځکه چا لیدلې؟ پوځي بریاوې یې چېرته دي؟ ولسي پاڅون یې چېرته دی؟ سیاسي نفوذ یې په کوم ځای کې دی؟
وژل د حکومتدارۍ په مانا نه دي. ترهګري سیاسي واکمني نه ده او پر داسې خلکو برید کول چې دفاع نشي کولی، د زورورو ماتول نه دي.
داعش خراسان لا هم وژلی شي، لا هم کورنۍ وېرولی شي او ژوند خرابولی شي؛ دا چاره هغوی خطرناکه معرفي کوي، خو بریالۍ یې نشي ثابتولی.
د هغه سازمان لپاره چې خپلو پلویانو ته د یوې امپراتورۍ د جوړولو ژمنه ورکوي، د دې تناقض او تضاد پټول ورځ تر بلې ستونزمن کېږي:
ارزانه وسلې. واړه بریدونه. مبالغه امیزه ادعاوې.
دا د غریبانو یا ارزانه بیې جهاد دی چې د انقلاب په نوم پلورل کېږي.

امواج پرس