په ایران کې تازه یو بل افغان د «قتل په جرم» پر اعدام محکوم شو. په پام کې ده د ايران یو قضايي پلاوی د قضايي همکاريو او پر اعدام د محکوم شوو افغانانو دوسيو ته د رسيدګۍ په خاطر د خبرو اترو له پاره افغانستان ته سفر وکړي.
ایراني چارواکو منلې چې په دغه هېواد کې د نورو بهرنیانو په پرتله ډېر افغانان بندیان دي.
ایسنا خبري آژانس د ایران د بهرنیو چارو وزارت د قونسلي چارو عمومي مدير علي رضا محمودي، له قوله لیکلي دي چې په ایران کې نژدې ۶زره افغانان بندیان دي.
محمودي زیاته کړې چې ډيری افغانان د قانوني اقامې د نه درلودلو، د مخدره موادو د قاچاق او ځينو نورو جرمونو په دليل بندیان شوي دي.
په ايران کې د افغانانو اعدامول
د ایران د بشري حقونو سازمان تېره اوونۍ په دغه هېواد کې د يو افغان وګړي له اعدامولو خبر وکړ.
دغه بنسټ ويلي دي دغه ۳۵ کلن افغان سبحان افتخار، نومېده چې د عمدي قتل په تور پر اعدام محکوم شوی وو او تېره اوونۍ د ایران د لرستان په الیګودرز زندان کې اعدام شو.
یوې سرچینې د ایران د بشري حقونو سازمان ته ويلي دي: «سبحان افتخارالدین درې نيم کاله مخکې نيول شوی او د نفس پر قصاص محکوم شوی وو.»
د دغه افغان د اعدام خبر، د ایران داخلي رسنیو او رسمي منابعو له خوا اعلان شوی نه دی. افغان حکومت هم په دې هکله څه نه دي ويلي.
افغانستان ته د اېران د قضايي پلاوي سفر
د افغانستان د بهرنیو چارو وزارت خبر ورکړی چې د دغه وزارت سرپرست امیرخان متقي د ايران له ځانګړي استازي او په کابل کې د دغه هېواد د سفارت له سرپرست حسن کاظمي قُمي، سره کتلي دي.
دغه وزارت زیاته کړې چې کاظمي قُمي ويلي دي چې ډېر ژر به د ايران یو قضايي پلاوی د قضايي همکاريو او پر اعدام د محکوم شوو افغانانو دوسیو ته د رسېدګۍ په موخه، د خبرو اترو له پاره افغانستان ته سفر وکړي.
ایران څه موده مخکې ۱۰۰ تنه افغان بنديان افغان حکومت ته وسپارل. د ایراني رسنیو په حواله، ایران تېر کال هم د ایران او افغانستان تر منځ د بنديانو د انتقال پر سر د شوي توافق پر اساس، شا او خوا ۸۰۰ افغان بندیان د بند د پاتې مودې د تېرولو له پاره د افغانستان حکومت ته سپارلي ول.
یو نظر پریږدئ