د سیمې درې هېوادونه څه باندې ۱۲۰ زره ماهر افغان کارګر جذبول غواړي
په افغانستان کې د کاري فرصتونو د محدودیت له امله، د کارګرانو اتحادیه وایي چې له هېواده بهر د کارموندنې لپاره هڅې زیاتې شوې دي.
د دغې اتحادیې په وینا، ایران، قطر او ترکیه د زرګونو ماهرو افغان کارګرانو د جذب غوښتنه کړې او په دې اړه له یادو هېوادونو سره تخنیکي خبرې روانې دي.
د ورکړ شویو معلوماتو له مخې، قطر د ۳ زره، ترکیې د څه باندې ۲۰ زره او ایران د نږدې ۱۰۰ زره ماهرو افغان کارګرانو غوښتنه کړې ده.
اتحادیه زیاتوي، که څه هم د دغو هېوادونو له خوا ټاکل شوي معیارونه سخت دي او تر ډېره پر ماهرو کارګرانو تمرکز لري، خو په هېواد کې د کارګرانو د وړتیا لوړولو لپاره روزنیز پروګرامونه پیل شوي دي.
د اتحادیې رییس، عبدالمتین مولويزاده، وویل: «هغوی داسې ماهر کارګران غواړي چې معتبر اسناد او سندونه هم ولري. له همدې امله هڅه کوو چې د کار وزارت د انسټېټیوټونو له لارې کارګران وروزو، اړین مهارتونه ور زده کړو او وروسته یې بهرنیو هېوادونو ته واستوو.» اقتصادي کارپوهان هم وایي، دا بهیر کولی شي د بېکارۍ په کمولو او د کورنیو د عاید په زیاتولو کې مهم رول ولوبوي، خو د کاري ځواک منظم مدیریت او روزنې ته اړتیا لري.
اقتصادي شنونکي میرشکیب میر وویل: «بهرنیو هېوادونو ته د افغان کارګرانو استول په لنډمهال کې د استول شویو کارګرانو د کورنیو اقتصادي وضعیت ښه کولای شي او د هېواد د بېکارۍ د ستونزې یوه برخه راکموي.»
که څه هم د سیمې هېوادونو ته د افغان کارګرانو استول نوې موضوع نه ده، خو په اوسنیو شرایطو کې یو ځل بیا د افغانستان د کار بازار له مهمو بحثونو څخه ګرځېدلې ده.
لومړی نظر وکړئ on "د سیمې درې هېوادونه څه باندې ۱۲۰ زره ماهر افغان کارګر جذبول غواړي"