په کابل کې د طالبانو د حکومت چارواکو ویلي چې نن سه شنبې، نومبر ۷ (لړم ۱۶مه)په سیمه ایز وخت، شاوخوا شپږ بجې د کابل ښار د دشتې برچې په سیمه کې د ملکي خلکو د سورلۍ په یو کاسټر موټر چاودنه شوې.
د کابل د امنیې قومندانۍ ویاند خالد ځدران په ایکس پاڼه کې لیکلي، چې په دغه چادونه کې ۷ تنه وژل شوي او ۲۰ تنه نور ټپیان شوي دي.
د نوموړي په وینا، سیمې ته امنیتي پلټونکي ټيمونه رسیدلي او د پیښې په اړه څیړنې پیل شوي دي.
بلخوا د کابل د لوېديځ يو شمېر اوسېدونکو پر ټولنيزو شبکو ليکلي، چې چاودنه د دشت برچي د مهتاب کلا په سيمه کې د محمد علي جناح روغتون ته څېرمه په يوه “کاسټر” ډوله موټر شوې ده.
تر اوسه د دې چاودنې نوعیت نه دی په ډاګه شوی، خو د ټولنیزو رسنیو ځینو کاروونکو لیکلي چې دا پېښه د مقناطیسي ماین د چاودنې له امله رامنځته شوې ده.
همداراز تر اوسه کومې ډلې د دې پېښې پړه پر غاړه نه ده اخيستې، خو په تېرو وختونو کې داعش ډلې په شيعه مېشتو سيمو او د شيعه ګانو پر مذهبي ځايونو ددغه راز بريدونو مسئوليت پر غاړه اخيستى دى.
د اکتوبر په ۲۶مه د دشت برچي په پل سوخته سیمه کې په یو ورزشي کلب کې د چادونې له امله څلور تنه وژل شوي او نهه تنه نور ټپیان شول. د دغه چاودنې پړه بیا وروسته داعش ډلې پر غاړه واخیستله.
همداراز د بغلان ولایت په مرکز پلخمري ښار کې د اکتوبر په ۱۳ (تلې۲۱مه) د پلخمري ښار په یوه جومات کې د چاودنې له امله لږ تر لږه ۱۰ تنه شیعه مذهبه لمونځ کوونکي وژل شوي او ۱۵ تنه نور ټپیان شول. د داعش خراسان څانګې وروسته ددغه برید پړه پر غاړه واخیستله.
د ۲۰۲۱ کال په اګست میاشت کې په افغانستان کې د طالبانو په بیا واکمنیدو سره، امنیتي پېښې د پام وړ کمې شوې، خو د داعش خراسان څانګه لا هم په افغانستان کې د یوه امنیتي ګواښ په توګه پاتې ده او له دوو کلونو راهیسې د ډېرو چاودنو او نورو امنیتي پېښو مسووله ده.
لومړی نظر وکړئ on "په کابل کې چاودنه؛ اووه تنه وژل شوي او ۲۰ نور ټپیان دي"