د پاکستان د بېړنیو خدماتو ادارې د چهارشنبې په ورځ وويل چې د پنجاب ایالت له سيلاب ځپلو کليو څخه کابو ۱۰۰زره کسان تخلیه شوي دي. چارواکي وايي سيلابونو په سلونو کلي او په زرهاو جرېبه کرهڼيزې ځمکې لاندې کړي دي.
رپوټونه وايي د يکشنبې په ورځ د پاکستان په ستلج سيند کې د اوبو سطحې تر لوړېدو وروسته، د دغه هېواد په پنجاب ایالت کې په سلونو کلي او په زرونو کرل شوې ځمکې تر اوبو لاندې شوې.
د پاکستان د بېړنیو خدماتو اداره دا وخت له سيلاب ځپلو سیمو څخه لوړو ځایونو ته د ځايي اوسیدونکو او څارويو پر رایستلو کار کوي.
د پنجاب د بېړنیو خدماتو ادارې ویاند، فاروق احمد، فرانس پرس ته وویل: «موږ یو لک کسان ژغورلي او هغوی مو امن ځایونو ته انتقال کړي دي.»
د کاشف محمود په نوم یو ۲۹ کلن ځايي اوسیدونکي وويل: «سيلابونه څو ورځې مخکې راغلل او زموږ ټول کورونه ېې ډوب کړل. موږ ټوله لار تر دې ځایه له ډېرو سختیو سره په پښو مزل کړی دی.»
د پنجاب والي، محسن نقوي، ادعا وکړه چې موسمي ورښتونو په ګاونډ کې هندي چارواکي وهڅول چې خپلې د اوبو اضافي زېرمې ستلج سيند ته خوشي کړي چې دا کار د سرحد پاکستان لور ته د سيلابونو د راوتلو سبب شو.
په رپوټ کې ويل شوي چې هندي چارواکو په سملاسي توګه په دې هکله څه نه دي ويلي. د پاکستان د پنجاب ایالت د طبیعي پېښو پر وړاندې د مبارزې ادارې په راتلونکو ورځو کې د موسمي ورښتونو اټکل کړی دی چې کېدای شي سخت سيلابونه له ځانه سره ولري.
په پاکستان کې موسمي سيلابونه د جون میاشتې په آخرو کې پیل شوي. له هغه وخت راهيسي له ورښتونو سره په تړاو پېښو کې تر ۱۷۵ ډېر کسان مړه شوي دي. د بېړنیو خدماتو ادارې پر اساس، ډېر دغه کسان د برېښنا د شارټیو او یا هم د کورونو د نړېدو په پېښو کې مړه شوي دي.
په پنجاب کې وروستي سيلابونه په داسې وخت کې راغلي چې پاکستان لا د تېر کال ويجاړونکو سيلابونو سره له مبارزې نه دی خلاص شوی. د تېرکال سيلابونو د پاکستان نژدې یوه پر درېمه برخه او څه باندې ۳۳ ميلیونه وکړي اغیزمن کړل.
لومړی نظر وکړئ on "پاکستان کې سيلابونه؛ کابو سل زره کسان تخلیه شوي"