د ملګرو ملتونو ادارو د کابل په دشت برچي کې په ښوونځي کې د چاودنې په اړه د څېړنو غوښتنه وکړه

د ملګرو ملتونو د ماشومانو وجهي صندوق (یونیسف) د کابل په مهدیه ولسوالۍ کې په یوه ښوونځي کې د چاودنې له امله د ۹ څخه تر ۱۴ کلونو پورې عمر لرونکو ۴۲ ماشومانو د ټپي کیدو په اړه ژوره اندیښنه څرګنده کړې ده.

یونیسف زیاته کړه چې دا ځورونکې پیښه د ماشومانو د دوامداره ساتنې او هغو اساسي خدماتو اړتیا ته یو بل یادونه ده چې دوی ورته اړتیا لري.

د ملګرو ملتونو د ادارې په وینا، “ښوونځي د نړیوال قانون له مخې خوندي دي او باید خوندي ځایونه پاتې شي چیرې چې ماشومان کولی شي زده کړه وکړي او وده وکړي، له ویرې، تاوتریخوالي او زیان څخه پاک وي.”

یونیسف د پیښې په اړه د بشپړې څیړنې غوښتنه بیا تکرار کړې او د ټولو ماشومانو د خوندیتوب، وقار او حقونو غوښتنه یې کړې چې په ټولو شرایطو کې درناوی او ساتنه وشي.

له بلې خوا، د ماشومانو او وسله والو شخړو لپاره د ملګرو ملتونو د ځانګړي استازي دفتر هم په چاودنه کې د لسګونو ماشومانو د ټپي کیدو راپورونو وروسته ژوره اندیښنه څرګنده کړې او د یونیسف په څیر یې د پیښې په اړه د بشپړې څیړنې غوښتنه کړې ده.

سازمان ټینګار وکړ: “ښوونځي باید خوندي او له تاوتریخوالي څخه پاک پاتې شي. ماشومان د ځانګړي خوندیتوب مستحق دي؛ هرچیرې او هر وخت.”

هغه چاودنه چې د دوشنبې په ورځ، د اګست په ۱۶مه، د ماښام شاوخوا ۵:۰۰ بجې د کابل په دشت برچي سیمه کې د یوه ښوونځي ته څېرمه وشوه، چې لسګونه ماشومان یې ټپیان کړل، نړیوال غبرګونونه یې راپارولي دي. د یونیسف او د ماشومانو او وسله والو شخړو لپاره د ملګرو ملتونو د ځانګړي استازي دفتر سربیره، اروپايي اتحادیه، یوناما او د بخښنې نړیوال سازمان د هغو سازمانونو په ډله کې دي چې د پیښې په اړه یې غبرګون ښودلی دی.

منبع