محمد نبي مزارشریف ښار کې پر یوه استوګنیز او سوداګریز مرکز پانګونه کوي

💬0

محمد نبي مزارشریف ښار کې پر یوه استوګنیز او سوداګریز مرکز پانګونه کوي

د کرېکټ ملي لوبغاړی محمد نبي عیسی‌خېل په مزارشریف کې د یوه استوګنیز او سوداګریز مرکز د جوړولو په برخه کې لس میلیونه ډالره پانګونه کوي.

دغه پروژه پر درې زره متره مربع ځمکه په ۱۵ پوړونو کې جوړېږي.

محمد نبي د دغې پروژې د جوړولو د چارو د پیل په مراسمو کې په بېلابېلو برخو کې د پانګونې د دوام او د هېواد په ګوټ ګوټ کې د اقتصادي پروژو د پراختیا په اړه د خپلو پلانونو یادونه وکړه.

محمد نبي عیسی‌خېل زیاته کړه: «دا پروژه به یوازې په مزارشریف کې نه وي، زموږ هڅه به دا وي چې په نورو ولایتونو کې هم ورته پراختیايي فعالیتونه ترسره کړو.»

په ورته مهال، د خصوصي سکټور مسوولینو هم په بېلابېلو برخو، په ځانګړې توګه د روغتیا او درملنې په برخه کې د پانګونې پر پراختیا ټینګار وکړ.

هغوی د معیاري روغتونونو جوړول او په دې برخه کې د پانګونې لپاره د مناسبو شرایطو برابرول مهم وبلل او د حکومت د لا زیاتو همکاریو غوښتنه یې وکړه.

د بلخ د سوداګرۍ او پانګونې خونې رییس، محمد ابراهیم غضنفر وویل: «په افغانستان کې د کورونو اړتیاوو ته د ځواب ویلو لپاره لا زیاتو پانګونو، نوښتونو او د خصوصي سکټور او مسوولو ادارو ترمنځ پراخو همکاریو ته اړتیا لرو.»

د ودانیز شرکت مسوول، غلام‌محمد حق‌دوست وویل: «موږ باید په بېلابېلو برخو، لکه علمي، فرهنګي، ټولنیزو او روغتیايي برخو کې د شته ستونزو د حل لپاره په راتلونکي کې لاسونه سره ورکړو او د سوداګرو په همکارۍ په بلخ کې یو معیاري او مجهز روغتون جوړ کړو.»

بل لور ته، د بلخ امنیې قوماندانۍ د امنیت آمر د پانګونو د امنیت ټینګښت او له پانګوالو سره د همکارۍ ډاډ ورکړ او له سوداګرو یې وغوښتل چې د افغانستان په بېلابېلو برخو کې پانګونه وکړي.

د بلخ امنیې قوماندانۍ د امنیت آمر، احمدضیا خالد وویل: «په بلخ کې ټولو پانګوالو او عامو خلکو ته سل په سلو کې ډاډ ورکوو چې موږ ستاسو د امنیت لپاره شپه او ورځ ولاړ یو او ستاسو هر ډول ستونزې به حل کړو.»

محمد نبي د جمعې په ورځ د څو ورځني سفر په ترڅ کې مزارشریف ښار ته راغلی و.

نوموړي د شنبې په ورځ له قوش‌تیپې کانال څخه د لیدنې ترڅنګ، په یوه استوګنیز ښارګوټي کې سړک او د اوبو رسولو شبکه هم پرانیسته.

منبع

لومړی نظر وکړئ on "محمد نبي مزارشریف ښار کې پر یوه استوګنیز او سوداګریز مرکز پانګونه کوي"

یو نظر پریږدئ

ستاسو بریښنالیک پته به خپره نشي.


*