په چمن کې د سپین بولدک پر لار د تلو راتلو لپاره د پاسپورټ او ویزې د جبري کېدو په غبرګون کې پرلت لا هم دوام لري.
د پښتونخوا ملي عوامي ګوند مشر، محمود خان اڅکزي پرلت کوونکو یوې غونډې ته په خبرو کې د پاکستان پر لنډمهالي حکومت غږ کړی څو په دغه پرېکړه بیا کتنه وکړي.
محمود خان اڅکزي زیاته کړې چې د پاکستان حکومت دې نور د چمن پر اوسېدونکو خپل زور نه آزمایي.
اڅکزي وویل: « موږ مه مجبوروئ کنه تاسو به هم بیا چمن له پاسپورټ سره راځئ.»
چمن کې د پاکستان سرپرست حکومت له لوري د سپین بولدک پر لار د تګ را تګ لپاره د پاسپورټ او ویزې د الزمي کېدو په غبرګون کې له پیل شوي پرلته څه باندې څلور میاشتې تیریږي.
د پرلت ځینې ګډونوال بیا وایي پاکستانی حکومت د چمن د خلکو اقتصادي کمزوري کولو او د قومونو تر منځ د نفاق اچولو لپاره هڅې کوي.
د چمن پرلت غړي، پهلوان وویل: « موږ د کاروبار او سوداګرۍ خلک یو. موږ سره له زوره کار مه اخلئ کنه دغه دروازه به بیا په اټک کې وي.»
د پرلت ځینې غړي بیا وایي په دې وروستیو کې د سپین بولدک پر دروازه د تګ راتګ لپاره د پاسپورټ او ویزې د جبري کېدو ستونزې د حل لپاره یې له پاکستاني چارواکو سره لیدلي او د ستونزې د حل ډاډ ورکړل شوی دی.
د پاکستان سره باید د پاسپورټ او ویزې مسأله بېخي له مینځه ولاړه شي،او د دواړو خواو تگ راتگ باید یوازې په پېژند پاڼه ترسره شي.
او یا هم د افغانستان اسلامي امارت ته پکار ده چې د پاسپورټونو وېش اسانه کړي او قېمت یې هم را ټیټ کړي
خو له بده مرغه چارواکي دې ستونزو ته هیڅ توجه نه کوي.