افغانستان د سیمې له هېوادونو سره د ۵۰۰ کیلو ولټه برېښنا د لیږد څلور پروژې تعقیبوي.
افغانستان د سیمې له هېوادونو سره د ۵۰۰ کیلو ولټه برېښنا د لېږد لینونو پورې اړوند څلور پروژې تعقیبوي، چې پکې ترکمنستان، ازبکستان، ایران او تاجکستان شامل دي.
د دوی هدف د برېښنا د لېږد شبکې پراخول او د سیمې د هېوادونو ترمنځ د انرژۍ د تبادلې ظرفیت لوړول دي.
د دې پروژو څخه یوه د ۵۰۰ کیلو ولټه سورخان-دشت-الوان برېښنا د لېږد لین دی چې د ۱۰۰۰ میګاواټه برېښنا د لېږد ظرفیت لري، چې د برېښنا او ازبکستان چارواکو یې د چټکولو په اړه بحث کړی دی.
د برېښنا شرکت ویاند محمد صادق حق پرست وویل: “د دې پروژې بشپړول به د انرژۍ همکارۍ زیاتولو، سوداګرۍ او پانګونې پراخولو، د برېښنا د لېږد ظرفیت زیاتولو او د دواړو هېوادونو د برېښنا شبکې پیاوړتیا کې مهم رول ولوبوي.”
د دې پروژو په منځ کې، په ترکمنستان او ازبکستان کې د ۵۰۰ کیلو ولټه برېښنا د لېږد لینونو د پروژو عملي کار د پلي کولو په مرحله کې دی.
د برېښنا شرکت لخوا د ورکړل شویو معلوماتو له مخې، ټاکل شوې ده چې له ترکمنستان څخه کابل ته د ۵۰۰ کیلو ولټه برېښنا د لېږد لین په راتلونکو لسو میاشتو کې بشپړ شي.
سربیره پردې، د ایران او تاجکستان سره د ۵۰۰ کیلو ولټه برېښنا د لېږد لین پلانونه هم بیاکتنه شوي او په دې اړه بحثونه روان دي.
د برېښنا شرکت پخوانی مشر امان الله غالب زیاته کړه: “موږ اوس مهال له ترکمنستان څخه د ۵۰۰ کیلو ولټه برېښنا د لېږد لین لرو چې له پلخمري سره نښلوي. تاجکستان هم غواړي چې د ۵۰۰ کیلو ولټه برېښنا د لېږد لین جوړ کړي ځکه چې دا مهال ۲۲۰ کیلو ولټه برېښنا لري او د یوې نوې کرښې په جوړولو سره، افغانستان ته ډېره برېښنا صادرولی شي.”
دا پروژې د ۱۰۰۰ او ۱۵۰۰ میګاواټو ترمنځ د برېښنا د لېږد ظرفیت لري.
تمه کیږي چې د دې پروژو په بشپړیدو سره به په سیمه کې د برېښنا د لېږد ظرفیت زیات شي او د سیمې د هېوادونو ترمنځ د انرژۍ د لېږد ساحه به پراخه شي.
د اقتصادي چارو کارپوه سیر قریشي د دې پروژې د بشپړولو د اهمیت په اړه وايي: “د برېښنا د لیږد شبکو پراخول کولی شي لګښتونه کم کړي، خو یوازې دا د ارزانه برېښنا تضمین نه کوي. اوس مهال، افغانستان شاوخوا ۸۰۰ میګاواټه برېښنا واردوي او د دې لپاره لویه بیه ورکوي. له همدې امله، د دې پروژو بشپړول کولی شي د برېښنا رسولو ته وده ورکړي، مګر سربیره پردې، د وارداتي برېښنا بیه هم باید په پام کې ونیول شي.”
د برېښنا د لیږد لینونو د پراختیا سربیره، افغانستان د خپلو کورنیو اړتیاوو د پوره کولو لپاره له ګاونډیو هېوادونو څخه د برېښنا واردولو پورې اړه لري.
لومړی نظر وکړئ on "افغانستان د سیمې له هېوادونو سره د ۵۰۰ کیلو ولټه برېښنا د لیږد څلور پروژې تعقیبوي."