د ملګرو ملتونو د امنیت شورا په غونډه کې د پاکستان او قطر په ګډون یوشمېر هېوادونو د افغانستان بشري وضعیت اندېښمنونکی بللی. په دې غونډه کې د خوړو پر ناخوندېتوب هم بحث شوی.

د ملګرو ملتونود امنیت شورا په غونډه کې د بریتانیا استازې باربارا ووډوارډ وویل، چې افغان مېرمنې اوس دوه غوراوي لري: «یا به خپل ماشومان پلوري او یا به هم په لوږه کې پاتې کیږي.»

د امنیت شورا په دې غونډه کې د پاکستان، هند، قطر، روسیې او سویس استازو هم د افغانستان پر بشري وضعیت او د خوړو پر ناخوندېتوب اندېښنه ښودلې.

د دې شورا اعلامیې د پاکستان د استازي محمد امیر خان له قوله لیکلي: «آټکل شوی چې ۱۵،۳ میلیونه افغانان په لوړه کچه د خوړو له ناخوندېتوب سره مخامخ دي.»

د هند استازي بیا په دې برخه کې له افغانانو سره د ۵۰ زره میټریک ټن غنمو د مرستې خبره کړې ده.

د روسیې استازي دیمتري پولیانسکي بیا په افغانستان کې د لوږې او بې وزلۍ ډېره پړه پر لوېدیځو هېوادونو اچولې.

نوموړې د بیلګې په توګه افغانستان یاد کړی چې له لوږې او بې وزلۍ څخه د راوتلو شل کلنې هڅې ځکه بې پایلې دي چې امریکا او متحدینو یې غوښتل دغه هېواد د لویدیځ په بڼه ولسواک کړي.

هغه زیاته کړې: «ډېر د خوړو حاد بحرانونه د امریکا او متحدینو له خوا یې په مستقیم او یا غیر مستقیم ډول هڅول شوي دي.»

په افغانستان کې خوارځواکي

دا څرګندونې داسې مهال دي چې د ملګرو ملتونو د خوړو سازمان تازه شمېرې ښيي چې په افغانستان کې شاوخوا ۳،۲ میلیونه خلک په خوارځواکی اخته دي.

In #Afghanistan, 3.2M people are currently malnourished.

So far this year, WFP supported over 4M women and children with specialized nutritious food to prevent or treat #malnutrition.#WBW2023 pic.twitter.com/yGQKq5w7ja

— WFP Afghanistan (@WFP_Afghanistan) August 3, 2023

دغه سازمان پر خپله ټویټرپاڼه لیکلي دي چې په روان کال کې یې له خوارځواکۍ سره د مبارزې په موخه د ۴ میلیونه ښځو او ماشومانو سره د ځانګړو خوړو مرسته کړې ده.

منبع