د افغانستان رېلپټلۍ ادارې مسوولین وایي چې د دغې ادارې د سرپرست تر مشرۍ لاندې یوه پلاوي ازبکستان ته سفر وکړ.
یادې ادارې په خپله فېسبوکپاڼه کې لیکلي: «نن چهارشنبه د افغانستان د اوسپنې پټلۍ ادارې د سرپرست ملا بختالرحمن شرافت په مشرۍ یوه ګډ پلاوي ازبکستان هېواد ته د حیرتان-مزارشریف اوسپنې پټلۍ د مسولیتونو د انتقال پروسې د نهايي کولو لپاره سفر وکړ.»
سرچینه زیاتوي، په دغه پلاوي کې د اقتصادي معاونیت، ملي تدارکاتو ریاست او ماليې وزارت استازي شامل دي.
د سرچینې د معلوماتو له مخې، په ازبکستان کې به د افغانستان رېلپټلۍ ادارې ته د حیرتان ـ مزارشریف رېلپټلۍ د انتقال ترڅنګ، له یاد هېواد سره د یوه هوکړهلیک نهایي کولو اړوند مفصل بحثونه هم وشي.
یاده اداره وایي: «تمه ده په دغه سفر کې د تفاهملیک له لاسلیکولو سره د حیرتان – مزارشریف له اوسپنې پټلۍ څخه د سوداګریزو توکو انتقالات بېرته پیل شي او په عادي توګه جریان ولري.»
هغه زیاته کړې وه، دغه ځنډ د ازبکستان رېلوې له خوا رامنځته شوی او افغان رېلپټلۍ اداره په تخنیکي او عملیاتي اړخ کې کومه ستونزه نه لري.
د یادونې ده، ازبکستان ۱۳ کاله مخکې د حیرتان- مزارشریف ترمنځ ۷۵ کیلومتره رېلپټلۍ د ۱۲۹ میلیون ډالرو په لګښت جوړه کړې ده.
هجرت الله کاکړ
لومړی نظر وکړئ on "د افغانستان رېلپټلۍ ادارې یوه پلاوي ازبکستان ته سفر وکړ"