د بدخشان ولایت په مرکز فیض اباد کې چاودنې “درې” طالب سرتېري وژلي او پنځه نور ټپیان دي.
د طالبانو حکومت کورنیو چارو وزارت وايي، چاودنه نن چارشنبه په ځايي وخت ۱۱ بجې پر هغو طالب سرتېرو شوې، چې “د کوکنارو فصل له منځه وړلو لپاره روان وو.”
د طالبانو د کورنیو چارو وزارت ویاند عبدالمتین قانع په اېکس لیکلي چې د دې پېښې په اړه پلتڼه کوي. تر اوسه کومې ډلې د دغه پېښې مسوولیت په غاړه نه دی اخیستی
په بدخشان کې د طالبانو د اطلاعاتو او کلتور د برخې مشر ذبیح الله امیري بيبيسي ته وویل، چاودنه د ښار په درېیمه ناحیه کې شوې ده.
د نوموړي په وینا پېښه د هغه “مین له امله رامنځ ته شوې چې په موټر کې سایکل” کې ځای پر ځای شوی و.
په بدخشان کې یوې ځايی سرچینې بيبيسي پښتو ته وویل، د چاودنې سیمې ته خبریالان نه پرېښودل کېږي.
دا چاودنه داسې مهال کېږي، چې د دغه ولایت په دوو ولسوالیو ارګو او داریم کې د کوکنارو فصل د اړولو پر سر اخ ډب کې دوه کسان وژل شوي وو.
د همدې پېښو په تړاو دغلته لاریونونه هم شوي دي. د طالبانو حکومت له لوري بدخشان کې د کوکنارو له منځه وړلو د بهیر او پر وړاندې یې د رامنځ ته شویو ستونزو د څېړنې په موخه یو پلاوی هم ټاکلی شوی و، چې مشري یې د طالبانو لوی درستیز قاري فصیح الدین فطرت کوله.
ښاغلي فطرت په یوه غږیز پیغام کې ټینګار کړی و، چې طالبان د کوکنارو د کروندو اړولو کې جدي دي او د طالبانو ځايي مشرانو ته یې سپارښتنه کړې وه چې د لاریونونو مخه ونیسي.
د طالبانو ویاند ذبیح الله مجاهد پرون ویلي و، هغه ستونزه اوس هواره شوې ده.
منبع
لومړی نظر وکړئ on "په بدخشان کې چاودنې درې طالب سرتېري وژلي، پنځه ټپیان دي"